Gibutangan na sa Dakbayan sa Mandaue ang ilang mga bike lanes sa major highways og plastic bollards aron mas luwas ang mga siklista sa ilang pagsikad.
Kini nabuhat pinaagi sa kooperasyon sa Department of Public Works and Highways.
Sa Facebook Live ni Atty. John Eddu Ibañez, executive secretary ni Mandaue City Mayor Jonas Cortes, ang pag-instalar sa plastic bollards usa ka parte sa bike lane network phase 1 sa Dakbayan.
Ang mga dalan nga nabutangan na og plastic bollards mao ang Ouano Ave., D.M. Cortes paingon sa U.N. Avenue ug sa mayn A.C Cortes Avenue.
Hunyo 2020, gisugdan sa Dakbayan sa Mandaue ang pagbutang og bike lanes sa tanang dalan sa dakbayan tungod sa ka limitado sa pampublikong transportasyon ug ang mga tawo mag-bike na lang paingon sa ilang trabaho.
Karon nga padayon gihapon ang paggamit sa ubang konstituwente og bisikleta, pinaagi sa plastic bollards mas luwas kini alang sa mga magbisikleta, sigon ni Ibañez.
Matod niya nga adunay mga parte sa mga dalan nga wa gibutangan og plastic bollards tungod kay adunay establisemento o mga parking lot nga kinahanglan i-access og sakyanan.
Sigon ni Ibañez nga ang gibutang nga plastic bollards di dali matangtang tungod kay bolted.
Kon adunay mabangga niini, dili ra kini dako og damage tungod kay ginama lang sa plastic.
Bisan gipasabot na ngadto sa publiko nga ang bike lanes ekslusibo alang sa mga magbisikleta, matod ni Ibañez nga duna gihapoy mga mag motor nga muagi sa bike lanes. / KFD