GIPAPAULI sa kapulisan sa dakbayan sa Mandaue ug kawani sa Traffic Enforcement Agency of Mandaue (Team) ang 50 ka bikers nga mosalmot unta sa bike race sa Zuellig Avenue, Mandaue City alas 4:30 sa buntag,Sabado, Pebrero 6, 2021.
Sa pakighinabi sa Superbalita Cebu ni Atty. John Eddu Ibañez, executive secretary ni Mandaue City Mayor Jonas Cortes, aduna siyay nakit-an sa Facebook nga adunay magpahigayon og lumba sa mga bikers sa Zuellig Avenue, luyo sa Cebu Doctor’s University (CDU).
Giadto ni Ibañez ang lugar ug didto niya nakompirmar.
Sigon niya nga gipangitaan niya og permit sa ilang ipahigayon nga bike race apan way napakita.
Pagbadlong sa kapulisan sa Mandaue City Police Office nga gipangulohan ni Police Major Zosimo Jabas ug mga kawani sa Team nga gipangulohan ni Edwin Jumao-as, ang bikers nipatuo dayon ug nanguli, sigon ni Ibañez.
Gikan sa alas 4:30 ngadto sa alas 6:00 sa buntag, matod ni Ibañez nga daghan pa gihapon nag-abot abot nga bikers ug giabisohan nila nga mouli.
Matod niya nga ang pagpahigayon sa lumba sa usa ka pampublikong dalan risgo sa kinabuhi sa bikers ug publiko tungod kay kuyaw sa disgrasya.
Ang Zuellig Avenue usa ka kilometro nga dalan ug truck corridor sa dakbayan, pasabot nga sagad sa mga trailer trucks, cargo trucks, wingvans ug uban pa diha moagi.
Tungod kay kini kompetisyon ug adunay premyo, matod ni Ibañez nga wala na sila makahunahuna sa ilang kaluwasan ug ang gihunahuna makadaog.
“Okay raman nga mag-bike kay bike-friendly man ang Mandaue. Adto lang sa bike lane, dili lang competitive nga racing,” sigon ni Ibañez.
Sa iyang pagpangutana sa bikers, matag Sabado kini ipahigayon sa nagkalainlaing mga grupo gikan sa lainlaing lugar sa Sugbo.
Naandan na nga dunay lumba matag Sabado sa maong lugar.
Sa nadunggan ni Ibañez nga adunay ihatag nga medal sa mga makadaog ug aduna sab nagpusta-anay og P20 ngadto sa P50. Kon kinsa ang makadaog, iyaha tanan ang nakolekta nga pusta.
Matod ni Ibañez nga ang mga biker nakalapas sa balaod sa kadalanan ug health protocol tungod kay adunay uban nga wala nag mask ug way social distancing. (KFD)