ANAA na sa 3,422 ang kinatibuk-ang ihap sa mga kumpirmadong kaso sa coronavirus disease (Covid-19) sa Cagayan de Oro human nagpositibo sa Sars-CoV-2 ang 29 ka mga residente sa dakbayan.
Sumala ni Acting City Health Officer Dr. Lorraine Nery, sa 29 ka mga bag-ong mga kaso, unom ang mga close contacts sa mga pasyenteng nagpositibo sa coronavirus, upat ang mga lokal nga authorized persons outside residence (Apors), 18 ang mga local index nga mga kaso, ug usa ka person deprived of liberty (PDL).
Sa 3,422 nga kinatibuk-ang kaso sa Covid-19 sa syudad, 421 ang mga returning overseas Filipino workers/locally stranded individuals (ROFs/LSIs) ug 3,001 ang mga local transmissions.
Matud ni Nery, sa 3,001 nga mga local nga kaso, 186 ang mga persons deprived of liberty, 1,530 ang mga local index cases, ug 1,285 ang mga local cases with link.
Ang Cagayan de Oro naay 272 ka mga active cases, 64 niini na-admit sa Northern Mindanao Medical Center ug uban pang mga ospital sa syudad, 205 ang mga outpatients, ug tulo ang mga ROFs/LSIs.
Nakatala usab og unom ka mga Covid-positive nga mga kaso nga karon naka-recover. Anaa na karon sa 2,975 ang ihap sa mga nakarekober nga mga kaso sa dakbayan.
Sa maong numero, 300 ang mga LSIs, 117 ang mga ROFs, ug 2,558 ang mga lokal nga kaso (community: 2,159; Apors: 399).
Ang ihap sa mga namatay sa Covid-19 sa syudad naa na sa 175.