NAGUOL ko pagkabasa nako sa post sa akong higalang si Allan Loyao kabahin sa kamatayon sa usa ka batan-on nga lalake nga nag mountain bike sa Barangay Lataban, Liloan. Samtang nagdulhog, nabangga siya sa kongkretong bungbong sa usa ka balay daplin sa dalan.
Sa pagsuwat ning akong column, wa pa ko masayod sa unsay hinungdan sa aksidente. Apan segurado ko nga dunay hinungdan nga may kalabutan sa biseklita. Posibleng napalpak ang brake. Duha ang hinungdan ra ba ini. Either ni malfunction ang brake kay hilis na kaayo ang pads o di kaha nibato na, wa na mokupot sa kainit or kusog kaayo ang iyang pagdulhog, wa na niya makontrolar ang biseklita.
Base lang sa akong experience, ang brakeset importante kaayo sa mountain biking. Kon braking system, way makalalis sa ka garantisado sa Shimano brand. Bisan sa mga review, maayo ang feedback. Kasaligan ang Shimano, apan depende sab ni sa naggamit.
UNSAY BUHATON
Sa di ka pa mo ride, susiha kon maayo ba ang function sa imong brakeset. Di ba hilis ang pads or maayo ba ang pagkupot ini unyag kumot nimo sa lever. Kon lawom na ang sawom sa imong pagkumot, panahon na nga imong ilisan ang brake pads. Mas maayo kon ang duha ka brake, likod ug atubangan, imong ilisan.
Mas maayo nga kada buwan, kon di ka man eksperto sama nako, o bag-o ka pa, ipasusi ang imong bike sa mekaniko kon unsa ang maayong ilisan nga part. Mas maayo kon ang imong mekaniko imong kaila ug higala aron masaligan ang evaluation sa imong bike.
Mas maayo usab nga ang klase sa imong rotor kanang di dayon moinit ug di mokaon og maayo sa pads kay kalas kon kanang hingaon og pads.
Kon motingog ang imong brakes, mas maayong ipatan-aw gihapon sa mekaniko kay di na maayo nga tilimad-on. Sa akong experience, dunay mga higayon nga di na kaayo maayo mokupot ang brake. Kon di masulbad sa mekaniko, pag-ilis og brakeset.
AYAW PALABI
Dunay ginaingon nga bisan unsa nga butang nga imong pasobraan, makadaut. Dunay higayon nga nagdulhog ko sa Transcentral Highway gikan mi sa Cantipla. Niabot na og 60 kilometers per hour ang akong speed. Sa akong pag brake, nalabay ang lubot sa bike, but nakabawi ko ug wa mabangga sa concrete wall sa daplin.
Sukad niadto, di na ko mosaylo og 55 kilometers per hour sa pagdulhog. Mobuhat ra sab ko ini kanang gikan sa Marco Polo padulong eskina sa JY Square.
Akong buot pasabot, ayaw pagkompyansa sa pagpakusog pagpadagan kon di ka segurado sa imong kapabilidad.
Sama sa akong us aka higala, nidulhog nga kusog kaayo. Wa na makapiog ang iyang brake sa kakusog, nabalitok siya, apan maayo na lang gani, duna siyay bag sa likod nga nakapahinay sa impact sa iyang pagkalamba. Kon wa pa, ospital na sab ang iyang padulngan.
Busa, kon mag mountain biking ka, pangutana sa mga duna nay experience, paminaw ug pagpatudlo. Di duwa-duwa ang biseklita, kuyaw ni kon magpataka ka sa karsada.