SUKWAHI sa mga pagduda, ang Vismin Super Cup mao na karon ang bag-ong professional basketball league sa nasod.
Kini human nga mismo ang Games and Amusement Board (GAB) maoy nangunay gyud sa paglusad ug pagpahibaw nga ila na kining giila nga ubos sa ilang hurisdiksyon.
Ang dungan nga paglusad ug pagpahibaw gihimo niadtong Pebrero 3, 2021 pinaagi sa usa ka virtual press conference.
Si GAB chairman Abraham “Baham” Mitra mibutyag sa iyang huygo todo nga suporta niini human niya matino ang maayong katuyoan sa liga diin makahatag og dakong benepisyo sa mga players, coaches ug uban pa nga nalakip niini ilabi na kadtong nga nagagikan sa Kabisay-an ug Mindanao.
Target nga makasugod ang unang conference karong Abril 9, ug sa kasamtangan dobling lihok karon ang gihimo sa mga organizers (lakip na kita niini) aron mahapsay ang tanang mga rekisitos ug masugdan dayon ang operation.
Apan kini kinahanglan mosunod sa tanang health protocols nga gihikyad sa Inter-Agency Task Force (IATF) - butang nga andam usab hangupon sa Vismin Cup.
Usa na niini mao ang pagpahigayon og tournament nga ubos sa bubble format, sama sa gihimo sa niaging season sa NBA.
Buot ipasabot nga ang tanang mga players, coaches ug team officials anha papuy-on sa usa lang ka dapit o hotel nga dili makagawas-gawas sulod sa tibuok conference. Usa ra usab ka venue ang duwaan.
Sa pagkatinuod lang, daghan ang dili motuo nga mamahimo kini niining panahona kay lagi gawas nga hasol, dako-dako pa gyu ang magasto sa team.
Pero alang ni Rocky Chan, chief operating officer (COO) sa Vismin Super Cup, ni secretary-general Chelito Caro ug ni league ambassador Dondon Hontiveros nothing is imposible kon ang tanan maghiusa sa pag-ayuda.
Tanang inisyatiba ilang gihimo ubos sa paggiya sa GAB ug tuod man hinayhinay nga mitin-aw tumong ug ang katuyo-an.
Laing tumong sa liga mao ang pagdiskobre og mga talents sa probinsiya.
Daghang mga maayong manuwa sa probinsiya apan tungod sa kakuwang og exposure wala sila madiskobrehi.
Kay kon di gud ka makaduwa sa Manila di gyud ka mapansin sa mga scout kay toa ra man masentro ang exposure sa Kaulohan. Ang classic example niini mao si Rey Suerte. Kon wala moduwa didto sa Manila dili gyud unta makit-an. Mismo si Hontiveros miangkon usab sa susamang kasinatian.
Mao nga kining Vismin Super Cup maoy tukma nga dapit alang sa mga probinsiyano.
So far, ang mga teams sa Visayas nga nagpanikad na nga moarangkada mao ang MJAS-Talisay, ARQ Builders/Lapu-Lapu City Heroes ni Jason Arquisola, KCS-Mandaue City Megabytes nga iya ni Ricky Verdida, ug ang XUR Homes Realty-Eastern Samar ni Jojo Gio Baquilod.
Ang Mindanao division langkuban sa Zamboanga City, Pagadian Explorers ni Mayor Samuel Co ug Rene “Dodong” Pamaran ug laing duha ka teams gikan sa Sindangan ni Sonny Diaz ug President Manuel A. Roxa ni Mayor Hendrick Vallecer.
Gawas ning atong gihinganlan, duna pay nagpadayon nga negusasyon ning mga teams nga nagpakisusi ug nagpakita og interest nga mosalmot. Congrats Vismin Super Cup for a job well done. (jun.migallen22@gmail.com)