Mongaya: Kon si Totol nidaog?

ANG post sa atong kauban nga si Bong Wenceslao kabahin ni Totol Batuhan ang nisugat kanato dihang niabli kita sa atong Facebook.

Matod pa, nagkinahanglan kita og magbabalaod nga dili sakop sa Committee on Silence. Nawala na man gud silang kanhi kongresista Tony Cuenco ug Raul del Mar. Bag-o sab namatay si kanhi senador John H. Osmeña.

Apan, sa akong tan-aw, ang mga botante sa south congressional district sa Syudad sa Sugbo wala lang gyud makaila kang Totol. Silingan lang baya silang Cong. Bebot Abellanosa diha sa Banawa ug si Totol. Mas nituo ang mga botante sa pasangil nga dili taga Sugbo si Totol.

Tinuod nga ang kliyente ni Totol isip usa ka abogado tua sa kaulohan. Apan tungod sa kombinasyon sa iyang mga koneksyon didto sa kaulohan ug paghigugma sa Sugbo, nasugdan ug hapit na mahuman kining Cebu-Cordova Link Expressway (CCLEX).

Kining CCLEX mao ang ikatulong taytayan nga nagsumpay sa isla sa Mactan ug sa Cebu mainland. Unang naplano kini sa panahon pa ni Mayor Mike Rama. Apan si Mayor Tomas Osmeña uban kang Sec. Adelino Sitoy ang niatubang kang Presidente Rodrigo R. Duterte pag-groundbreaking niini sa miaging 2017.

Ug nasuweto ko sa dakong papel ni Atty. Totol Batuhan sa pagtahi ug pagplantsa sa tanang mga gum-os aron madayon ang maong proyekto. Di lang gyud epal kining tawhana busa gamay ra gyud ang nakahibawo sa iyang dakong papel.

Tungod ni Cong. Abellanosa, nahuman gyud ang underpass sa Mambaling. Apan kon itandi sa CCLEX, layo ra kaayo kini. Unsa kaha kon si Totol pa ang nidaog sa 2013?

Karong 2022, mahuman ang termino ni Cong. Abellanosa. Gihugon-hugon nga modagan siya isip mayor o bise mayor sa Syudad sa Sugbo. Matod pa, wa man siya manimaho nga sama sa kalibre nilang Cong. Del Mar ug Tony Cuenco, apil siya sa importanteng mga kampo nilang kanhi House Speaker Gloria Macapagal-Arroyo ug incumbent Speaker Lord Velasco.

Tuod man, mahimong dakong hawan na ang katungdanan isip kongresista alang kang Totol Batuhan. Isip kongresista, makalaom na unya kita og mga dinagkong proyekto.

Pananglitan, duna untay gitrabaho si Totol nga dakong desalination plant ug kining dam sa Mananga alang sa Metro Cebu Water District (MCWD). Makasulbad unta kini sa suliran sa tubig nga atong giatubang. Daghan sab ang mga Sugboanon ang makatrabaho.

Apan gilusaw kini ni Mayor Edgar Labella human siya nidaog sa Mayo 2019. Hangtod karon, ang MCWD board ni Labella igo ra gyud tawn kutob sa paghatod og tubig gamit ang water tankers. Wa makapaagas 24/7 sa atong gripo.

Nagtuo ko nga duna pay dagkong kaayuhan nga mahimo si Totol gawas nga dili kini mahimong Committee on Silence sa Kongreso.

Mao nga naglantaw unya ako nga mapili na nga kongresista si Totol Batuhan. DM @anol_cebu sa Twitter

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph