USA ka balaudnon nga gipangamahanan ni Senador Manny Pacquiao nga magdugang sa bidlisiw sa haring adlaw nga naa sa atong nasudnong bandila o national flag. Kon nakabantay mo nga adunay tulo ka bituon ang atong bandila nga nag-presentar sa tulo ka mga dagkong isla sa nasud nga mao ang Luzon, Visayas ug Mindanao. Unya adunay walo ka mga rays o bidlisiw nga nag-alirong sa adlaw. Kanang mga bidlisiw mao ang walo ka mga lalawigan nga mi-alsa ug nakig-gubat batok sa mga Espanyol nga misakop kanato sulod sa pipila ka siglo.
Kini mao ang: Manila, Cavite, Bulacan, Pampanga, Nueva Ecija, Tarlac, Laguna ug Batangas. Apan sa original nga English translation wala maapil ang Tarlac. Puro mga lalawigan sa Luzon no? Nganong wala maapil ang ubang mga lugar sa Visayas, apil na ang Sugbo nga unta aduna may rebolusyon dinhi nga gipangulohan ni Pantaleon Villegas nga nailang si ‘Leon Kilat’? Ang ‘Battle of Tres de Abril’ diay. Bisan gani sa Mindanao, aduna may rebolusyon nga gipanguluhan sa Sultanate of Maguindanao nga si Sultan Kudarat.
Bias o adunay pagpihig ang misuwat sa atong kasaysayan. Kini gumikan kay naka-sentro lang sa taga Luzon ang halos tanang mga bayani nga unta aduna man poy gi-ilang mga bayani sa Kabisay-an ug Mindanao nga miula sa ilang dugo ug mihalad sa ilang mga kinabuhi aron pagpanalipod sa atong nasud.
Nahatagan og pagtagad ang walo ka mga lalawigan gumikan kay didto nagbase ang mga Katipunero nga mi-alsa batok sa Espanya. Gani gi-Martial Law sa Espanya ang maong mga lalawigan. Panahon ni Emilio Aguinaldo ang pagdesinyo sa nasudnong bandila ug maoy nagpili sa color combination nga mao ang puwa, puti ug asul samtang naka-exile siya sa Hongkong.
Gusto ni Pacquiao nga ibutang ang ika-siyam nga bidlisiw nga mag-representar sa mga Muslim sa Mindanao. Apan kining maong balaodnon dugay na gisang-at ni Senator Franklin Drilon. Gikopya o gisubli lang ni Pacquiao. Apan gisupak sa taga National Historical Commission of the Philippines (NHCP) ug sa pipila ka historians kay ila nga gisubay ug gisunod ang kasaysayan. Matod nila nga taga Mindanao na-representahan na sa usa sa tulo ka mga bitoon. Ambot kon molusot ba ni karon?