WAY nasikop sa paglapas sa liquor ban sa Dakbayan sa Sugbo ang Cebu City Police Office sa Pebrero 4 sa gabii.
Apan nakadakop sila og mga tawo nga nakalapas sa mga health protocol sa ilang Oplan Bulabog.
Gisugdan sa kapulisan ang mga roving sa Huwebes sa gabii aron pagtuman sa liquor ban ni Mayor Edgardo Labella.
Matod ni Police Lieutenant Colonel Wilbert Parilla nga sa gihimong Oplan Bulabog, ilang kauban ang Crisis Response Battalion Management (CRBM) apan nagmingaw ang mga imnanan.
Lakip sa ilang gisulod ang mga barangay nga dunay taas nga mga kaso sa coronavirus disease (Covid-19) nga ilang gihulagway nga nagmingaw na usab.
Nabantayan ni Parilla nga nahibawo na ang publiko nunot sa kanunay nila nga pagpahibawo sa media nga ilang estriktohon sa pagpatuman ang executive order sa mayor.
Apan adunay 84 ka mga tawo nga ilang nadakpan nga wa motuman sa minimum health standard sama sa wa pagsul-ob sa facemask ug nakalapas sa curfew.
Ang Parian Police Station nakadakop og usa, 18 sa Abellana Police Station, siyam sa Mabolo police, 16 sa Carbon police, 14 sa Sawang Calero samtang upat sa Guadalupe Police Station ug 12 sa Labangon Police Station. (AYB)