Ex-OFW niyarok og hilo

Ex-OFW niyarok og hilo

MATANAO, Davao del Sur -- Wa na gihuwat sa 48-anyos nga lalaki nga magkauli ug magkauban pa sa Valentine's Day ang iyang uyab human gitapos niini ang iyang kinabuhi alas 8 sa buntag Dominggo, Pebrero 7, 2021.

Giila ang biktima nga mao si Joel (apilyedo gitago), molupyo sa Barangay Dalumay, Magsaysay sa nahisgutang probinsiya.

Sa imbestigasyon sa Matanao Municipal Police Station, nasayran nga miadto ang biktima sa balay sa iyang uyab sa Purok Maligaya, Barangay Bangkal ning lungsod ug nagdala pa og pasalubong nga bulad nga mao ang iyang negusyo sa dihang tua pa siya sa gawas nanarbaho isip overseas Filipino worker (OFW).

Apan sumala sa kapulisan nga naabtan ni Joel sa balay ang kambal nga igsuon sa iyang hinigugma ug wala siya gipanumbalinga niini.

Nasayran nga ang iyang uyab mismo milakaw ug tua padulong sa silingang lungsod sa Bansalan.

Nagtuo ang kapulisan nga naalaan sa biktima nga ang kambal nga igsuon mao ang iyang uyab ug tungod kay wa siya panumbalinga niini, nagtuo siyang gibuwagan siya niini.

Milabay ang pipila ka minutos, nakit-an na lang ang biktima nga nagbula-bula na ang baba kon diin tapad niini ang gamay'ng garapa o botelya sa Lanate nga pestisidyo.

Narekober sab sa kapulisan ang suicide note nga gibilin nga nagkanayong uyab niya si Lisa ug aduna na silay papeles aron magpakasal.

Nalibog ang kapulisan sa maong mensahe kay ang biktima minyo man ug ang tinuod niyang asawa tua sab sa laing nasud isip OFW usab.

Gidala ang patay nga lawas sa biktima ngadto sa punerarya sa lungsod sa Bansalan alang sa post mortem investigation.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph