Duha ka mga sakop sa Cebu Media sa duha ka managlahi nga dapit maoy nakakabig sa akong pagtagad sa akong pagmata gahapon, Pebrero 7. Si Ruel Rosello, usa ka artist ug photo journalist sa SunStar Cebu kaniadto ug karon padayon sa maong trabaho sa Public Information Office sa Cebu City Hall.
Samtang si Insoy Niñal nga usa ka kolumnista, writer, teacher, singer , magsisibya, farmer ug daghan pang abilidad. Ang post nilang duha sa Facebook maoy namukaw nako aron akong iasoy akong kasinatian sa mga dapit nga ilang nahimutangan.
Una si Ruel, nipaambit sa iyang kahanas sa pagdibuho. Sa iyang post, iyang gipahibalo nga didto siya nag-sketch sa Shell Island nga nahimutang atubangan sa Adwana ug Pier 1 sa dakbayan sa Sugbo. Pagka nindot nga location alang sa usa ka artist sama niya nga magdibuho sa mga maanindot nga talan-awon sa palibot.
Ang maong dapit maoy kanunay nakong maagian niadtong magbisitahan pa ko sa isla sa Tonggo, sakop sa lungsod sa Cordova, Cebu. Nagtapad ra ang Shell ug Tonggo. Sa maong isla nagpuyo ang akong mga higala, ang magtiayong Jun ug Maria Piamonte. Panagat maoy ilang panginabuhi. Ako silang nailaila human ilang gireklamo sa akong tulomanon sa radyo niadtong 1987 ang ilang pumpboat nga gikawat.
Nagpatabang ko sa mga pulis sa Taboan ug na-recover ang pumpboat. Mao toy sinugdanan sa among panaghigalaay hangtod karon. Mao sab to ang hinungdan sa makanunayon nakong pagbisita sa maong isla kuyog sa akong mga kauban sa sibyaanang Bombo sama nila ni Bobby Nalzaro, Pina Arcillas ug mga reporter aron mohumol sa maanindot nga dagat. Dinamita ray kuntra sa mga bahandi sa dagat niadtong panahona.
Wala pay mga infrastructure project nga gipasiugdahan. Tingog sa pumpboat ray mosiak sa kamingaw sa dapit. Dili parehas karon nga may mga heavy equipment ug dump truck sa palibot tungod sa gitrabaho nga tulay.
Sa pikas nga bahin, si Bay Insoy nag-post og iyang hulagway atubangan sa usa ka tindahan didto sa Barangay Guimbawian, Pinamungajan. Wa ko masayop apil to sa iyang ruta sa ilang pagbisiklita. Sa pagsugod sa pandemiya, akong nasayran nga nibalik siyag puyo kuyog ang iyang pamilya sa Poblacion, Pinamungajan. Kay way tukar, ang pag-ugmad sa yuta maoy iyang gipahimungtan diin nadasig niya ang daghang mag-uuma sa pagsagop sa bag-ong paagi sa pananom ug pagbuhi og kahayopan. Pinaagi kini sa Lamac Multi-purpose Cooperative nga iyang giapilan.
Ang iyang post maoy nagpahinumdum nako sa akong coverage pagtino sa report nga si World Champion ug Senador Manny Pacquiao, taga Guimbawian. Wa gyud ko masayop. Ang kapitan kaniadto nga si Berting Pongase nimatuod niini sanglit siya ug ang papa ni Sen. Manny mag-agaw. Ang maong report gikonpirmar mismo sa senador. Agi og pagmatuod niini, iyang giduaw ug gihimamat ang iyang mga paryente atol sa kapistahan sa maong lungsod.