GIKATAKDA ang groundbreaking ceremonies alang sa moderno nga Carbon Public Market nga mobalor og P5.5 bilyones karong sunod buwan.
Ang lima ka tuig nga proyekto gi-award sa kagamhanan sa siyudad sa Sugbo ngadto sa Megawide Construction Corp. ubos sa usa ka public-private partnership (PPP).
Ang 112 na ka tuig nga Carbon Public Market mao ang labing dakong merkado publiko sa siyudad sa Sugbo. Liboan ka mga tawo gikan sa ubang mga siyudad ug kalungsoran ang mangompra sa maong merkado matag adlaw. Gipaabot nga mahimo kining usa ka modernong trading post sa tuig 2025. Ang construction ug management company nga Megawide kabahin sa GMCAC, ang consortium nga nagdumala karon sa Mactan Cebu International Airport ug maoy nagtukod sa Mactan Airport Terminal 2 (T2).
* * *
Unsay mahitabo sa mga manindahay sa Carbon Public Market samtang magpadayon ang redevelopment niini? Si Louie Ferrer, chief corporate affairs and branding officer sa Megawide, mipasalig nga way bisan usa ka vendor nga papahawaon.
Matod ni Ferrer, i-renew ang mga kontrata niadtong vendors nga nahilakip sa listahan sa City Market Operations Division hangtod sa Disyembre 31, 2020. Sa ato pa way kabalak-an ang mga manindahay sa Carbon.
Si Ferrer niingon nga ilang unahon sa pag-ayo ang Unit 2 Building sa Carbon Market aron himuong temporaryo nga katindahan sa mga manindahay samtang nagpadayon pa ang construction sa modernong Carbon Market.
* * *
Laing gipasalig ni Ferrer mao nga bisan pa sa redevelopment sa Carbon, way umento sa market fee. Kon gikinahanglan man kini nga umentohan, moagi kini sa pagrepaso sa Cebu City Council.
Ubos sa timeline sa Megawide, unahon pagtukod ang land terminal sa third quarter ning tuiga. Isunod pagtukod ang Puso Market ug Santo Niño Park. Mahuman kini sa fourth quarter ning tuiga. Tukuron ang ferry terminal sa fourth quarter sa 2022.
Ang bag-ong building sa Carbon Market mahuman sa fourth quarter sa 2023.