MOABOT sa 50 ka mga sugarol sa ilegal nga sabong lukop dakbayan sa Sugbo sa duha ka adlaw nga pagpangronda sa mga estasyon nga sakop sa Cebu City Police Office (CCPO) ubos sa hugot nga pag-monitor sa mga barangay nga ilang nasakpan.
Labing daghan nga nadakpan ang Mabolo Police Station 4 nga moabot sa 16 ka mga sugarol sa sabong didto sa Sityo Peace Valley sa Barangay Lahug, alas 2:30 sa hapon, Dominggo, Pebrero 7.
Gisundan sa Mambaling Police Station, diin 11 ang nasikop sa Sityo Laguna, dan B. Aranas, Barangay Duljo Fatima niadtong Sabado, Pebrero 6.
Ikatulo nga ubay-ubay nga nadakpan ang Talamban Police Station, nga dunay walo ka mga tawo ang naposasan ug ang Parian Police Station, dunay pito ka mga tawo. Ang labing ubos og ihap sa nadakpan mao ang Pardo, Labangon ug Abellana Police Stations.
Sa Mabolo Police Station, ang pagronda sa tigbakay gipangulohan ni Police Major Francis Renz Talosig, hepe sa maong estasyonan.
Ang mga nadakpan mao sila si Desiderio Estremo, 58; Venancio Dongel, 43; Daryll Sanchez, 24; Edgar Loterte, 47; Kevin Gargar, 21; Jose Tigbao, 45; Isabelo Baylosis, 57; Jhon Kenneth Ursal, 40; Jupiter Sanchez, 36; Benjamin Secuya, 4; Jerry Tapongot Jr., 29; Edwin Antalan, 42; Edardo Vergara; Elmer Landeza, 34; ug Rosaldo Camay, 36; pulos molupyo sa Barangay Camputhaw.
Nasakmit sa maong pagpangronda ang duha ka manok igtatari, kwarta nga pusta sa sugal nga P1,200 ug paraphernalia sa pangsabong.
Sa Sityo Laguna sa dan B. Aranas sa Barangay Duljo Fatima, ang grupo ni Police Major Dindo Juanito Alaras, hepe sa Mambaling Police Station-11, nakadawat og taho kalabot na sa panagtapok sa sugal.
Ang mga nadakpan sila si Carlito Cabante, 51; Rey De Leon, 34; Arnold Nirena, 36; Michael Chua, 29; Raul Rodrigo, 43; Joneven Bohol, 46; Aldrin Camomot, 46; Rommel Tagnile, 40; Cresildo Jumuad, 39; Conrado Cosares, 42; ug Mark Guerta, 31; pulos mga molupyo sa Duljo Fatima.
Atol sa dakop sa tigbakay nila Alaras, nasakmit ang manok igtatari, kwarta nga P860.00 ug parapernalyas sa pangtari.
Laing pito pa ang nadakpan sa Parian Police didto sa Silangan 2 sa Barangay Tejero ug upat ang nadakpan sa Pardo Police Station 7.
Tag duha ka mga sugarol ang nadakpan sa Abellana Police Station ug Labangon Police Station, ug walo ka mga sugarol sa Talamban Police Station.
Ang 50 ka mga nadakpan sa ilegal nga sugal mag-atubang og kaso nga kalapasan sa Presidential Decree (PD) 1602 o ang pagduwa sa ilegal nga sugal. (BBT)