GITAY-OG na usab ang Davao del Sur sa kusog nga linog niadtong Dominggo. Ikaduha na kining linog sa tuig 2021.
Matud pa sa National Disaster Risk Reduction Management Council niadtong Enero 21 nga Magnitude 7.1 ang nitay-og sa Jose Abad Santos, Davao Occidental. Maayo na lang kay lawom daw ang gigikanan sa maong linog mao nga walay kadaut nga nahitabo. Ang ikaduha mao ang linog nga nahitabo mga 12:22 sa hapon niadtong Dominggo nga niabot og Magnitude 6.3 nga nagagikan sa Munisipyo sa Magsaysay, Davao del Sur.
Kung wa ko masayop gitawag ang Magsaysay kaniadto og Kialig nga nahimutang haduol sa Bansalan ug Digos City. Mao usab kini ang lugar nga grabeng naigo sa sunod-sunod nga linog gikan sa Oktubre ngadto sa Disyembre 2019.
Nakahinumdom ko nga nakabisita ako sa ilang nindot ug bag-o lang nahuman nga Munisipyo sa Magsaysay ug didto mi nag-istorya ni Mayor Davin sa iyang harianong opisina nga nahugmak na karon.
Hangtud karon wa pa makatindog pagbalik ang pipila ka pamilya nga nabiktima sa maong kalamidad. Dili lang ang Magsaysay ang naigo. Hasta ang kasikbit nga mga lungsod sa Davao del Sur sama sa Padada, Hagonoy, hasta ang Digos, Makilala ug Kidapawan, North Cotabato.
May natumpag nga lugar sa tiilan sa Mt. Apo mao nga liboan ka mga pamilya ang namakwit. Hasta ang karaang duha ka andana nga tindahan nga anaa sa sentro mismo sa lungsod sa Padada nahimo na lang usa ka andana kay napasok sa ilawom tungod sa linog. Maayo na lang nga way mga tawo nga namatay sa maong katalagman. Sama sa Magsaysay, daghan sab nga pamilya nga wa pa makatindog tungod niini. Mao nga di malikayan nga gimila-mila na sila kung may linog na sab.
Akong gi-text ang akong higala nga si Yhen Perales sa Magsaysay nga anak sa among suod nga silingan nga si Judith Perales kung OK ra sila.
Nitubag dayon siya nga wa may natumpag sa ilang lugar apan grabe gyud ang ilang kahadlok kay pinakalit og kusog kaayo ang linog.
May phobia o gibating tinago nga kahadlok na ang katawhan dihang dapita kay di lalim ang mabiktima. Magpasalamat ta kung way makalas nga kinabuhi apan sayang gihapon ang kabtangan nga nawala o nadaut tungod sa linog.
Si Lalay nga usa nako ka kaila nga may duha ka condo unit sa may Ecoland, way nadawdaw sa iyang propyedad nga natumpag. Hasta ang iyang bag-ong Hilux pick-up nga gigarahe sa ilawom sa condo napislat sab sa kabug-at sa semento nga nitabon. Nahitabo ang maong linog nga wala siya sa Pilipinas kay langyaw man ang iyang bana busa nasayangan kaayo siya sa nahitabo. Hasta ang tanang tag-iya sa nahugno nga condo nagbakho hangtud karon.
Bisan moadto ta karon sa Davao del Sur, anaa pay pipila ka tulda ang gipuy-an sa mga biktima sa niaging linog ilabi na kadtong nagub-an og pinuy-anan.
Busa mas maayo nga mag-amping ta kanunay dili lang tungod sa bag-ong klase sa Covid-19 kay wa ta kahibalo kung kanus-a mobutho ang kusog nga linog.