Mga sementong balay nangliki sa linog

Hulagway iya ni Orlando B. Dinoy
Hulagway iya ni Orlando B. Dinoy

MAGSAYSAY, Davao del Sur - Nagdala og damyos ang Magnitude 6.1 nga linog sa duha ka sunod-sunod nga pagtay-og kon diin ang episentro niini nanukad dinhi mismo sa lungsod, Dominggo, Pebrero 7, 2021.

Ang unang pagtay-og mitala lang og Magnitude 4.8 alas 7:28 sa buntag ug nasundan kini sa ikaduha alas 12:12 sa udto base sa taho sa Philippine Institute of Volcanology and Seismology (Phivolcs).

Sa post ni Lemo Alemento, makita ang nangliki ang bahin sa ilang balay sa Barangay Barayong ning lungsod.

Sa Barangay Rizal sa silingang lungsod sa Bansalan, gi-post usab ni Brgy. Kapitan Danilo Soberano ang usa balay nga semento human nahugmak sa linog.

Bisan sa siyudad sa Digos, pipila ka mga establisemento ang miliki sa linog apil niini ang atubangang bahin sa usa ka dakong mall sa dakbayan.

Sa pagsuwat ning balita, padayon pang mihimo og assessment ang Municipal Disaster Risk Reduction and Management Office (MDRRMO) sa lugar aron masuta kung pila'y kantidad sa mga nahimong damyos sa kusog nga pagtay-og.

Nagpahimangno sab ang MDRRMO sa publiko nga mag-amping kanunay sanglit padayong nasinati ang mga aftershocks kagahapong adlawa.

Way kinabuhing nakalas o naangol atol sa kusog nga pagtay-og sa lungsod. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph