Gianunsyo sa mga lider sa libuan ka mga vendor nga pabor sila sa modernisasyon sa Carbon market, apan supak sila sa pribado nga pagkolekta sa renta ug ubang bayranan sa higayon nga mosugod na ang operasyon.
Kini ang gipadayag ni Erwin Gok-ong, chairman sa Cebu Market Vendors Development Cooperative (Cemvedco), nga gilangkuban sa mga stall holder owners ug ni Maria Pino, sa Cebu City United Vendors Association (Ccuva), grupo sa mga ambulant vendor nga naninda daplin sa mga karsada sanglit pabor sila sa kalambuan
“Una, dako namong pasalamat ni Mayor Edgar Labella ug sa Cebu City Council nga nakakab-ot niining maong proyekto. Ang kalambuan sa Siyudad sa Sugbo mao usab ang among gipangandoy, apan aduna kami kahadlok ug kahingawa sa maong kasabotan,” tipik sa press statement sa mga vendor.
Ubos sa joint venture agreement (JVA) nga gipirmahan tali sa Cebu City Government ug Megawide, nag-ingon nga ang public market pagadumalaon sa Siyudad apil na ang pag-operate ug pag-mentenar pinaagi sa ilang i-nominate nga mao ang Megawide, kinsa contractor sa proyekto.
Gumikan niini, ang ilang grupo niduso nga ipabilin sa Siyudad ang pagkolekta sa rental fee ug ubang bayranan sa merkado.
“Ang among hangyo o panawagan sa maong isyu mao kini: ang public market pagadumalaon sa Cebu City Government under the office Cebu City Market lakip na ang pagkolekta sa mga balayranan diha sa merkado ug pagdumala sa tanan nga mga pasilidad sa merkado,” dugang sa ilang press statement.
IPAHIMUTANG
Si Kapitan Mark Miral sa Barangay Ermita nanawagan usab sa City Government nga hatagan og kasigurohan ang kapin 1,000 ka pamilya sa sityo Bato, Ermita nga mapahimutang sanglit apil sa development ang nahisgutang sityo.
Matod pa ni Miral nga kon di mahatagan og solusyon ang umaabot nga problema nga mahitabo sa sityo Bato gumikan kay apil kini sa himuong development sa Carbon, posible nga moalkontra ang mga residente sanglit mawagtangan na sila og pinuy-anan.
Ang grupo nila ni Gok-ong, Pino ug Miral mapasalamaton sa pagatukoron nga Public Market Oversight Committee (PMOC) nga langkuban sa representante sa Megawide Construction Corp., Cebu City Hall ug vendors aron adto nila ipadangat ang ilang mga concern.
Si Louie Ferrer, executive director sa infrastructure development sa Megawide Corp., nagkanayon nga magsugod ang construction sa phase 1 nga mahimutang sa Freedom Park ug Warwick Barracks karong Septiyembre 2021 human sa renovation sa estruktura sa Unit 2 nga maoy balhinan sa mga vendor nga apektado aron way makulob nga kaldero samtang nagpadayon ang construction.