MOABOT na sa nasod ang 117,000 ka mga bakuna gikan sa Pfizer sa Pebrero 15 o sa katapusan nga semana ning buwana.
Bahinon kini sa duha tungod kay dunay mga tawo nga nagkinahanglan og duha ka doses sa vaccines.
Tungod niini, gisugdan na sa Department of Health (DOH-7) ang pagpahigayon og seminar ug training sa tanan nga mga sakop niini alang sa coronavirus disease (Covid-19) vaccination program.
Gibutyag ni Dr. Mary Jean Loreche, chief pathologist ug tigpamaba sa DOH 7, nga sa kasamtangan adunay 2,987 ka healthcare workers ang anaa sa listahan sa Vicente Sotto Memorial Medical Center (VSMMC) nga unahon sa pagbakuna.
Apan sa maong gidaghanon, 2,480 ra ang niuyon nga magpabakuna. Wa mosulti si Loreche nganong dunay mga healthcare worker nga di gustong magpabakuna. Subay niini, gipasabot ni Loreche nga bisan kon aduna nay bakuna, di pa kini kasigurohan nga luwas na sa sakit.
Alang kaniya, premature o sayo pa usab nga itumbok kon ang bag-ong UK variant o ubang variants na ang hinungdan sa nagkataas nga listahan sa mga kaso sa sakit.
Subay sa uwahing talaan sa DOH 7 sa bag-ong mga kaso sa Covid-19 sa Pebrero 7, adunay 121 nga mga bag-ong kaso sa sakit nga nidala sa kinatibuk-ang mga kaso ngadto sa 2,096 mga kaso sa syudad sa Sugbo.
DI MASEGURO
“Whether we have the UK variant, I don’t want to pinpoint it to the UK variant. We cannot prematurely say that unless we get the actual result,” matod ni Loreche.
Kinahanglan nga di usab paluagan sa mga tawo ang pagsunod sa health ug quarantine protocols tungod kay posible nga aduna pa’y laing variant nga nitumaw sa Kabisay-an apan wa pa masuta.
“People have forgotten that we need to really have that close adherence to the public health protocols kay wala man ta’y tambal ani when there are variants will come out... the other variants can either mean mas taas ang transmission or pwede nga mas severe ang case or dili na nuon siya severe. There might be more milder cases instead of the severe ones if we have these variants,” dugang ni Loreche.
Aron mapanalipdan sa sakit, uyon usab ang buhatan sa pagdoble sa sul-ubon nga mask ug kanunayon ang pag sul-ob sa faceshield ilabi na sa mga residente sa Dakbayan sa Sugbo.
Kon ugaling motumaw ang bag-ong variant sa Sugbo, wa hinuoy gilantaw nga kausaban sa paagi sa pagpanagang sa kagaw, apan susihon sa mga opisyal ang testing policies.
Awhag ni Loreche nga magtinabangay ang tanan sa pagsunod sa protocol ug pagpasabot sa mga tawo sa importansya sa pagpabakuna.