KAALYADO ni silang Mayor Edgar Labella ug Bise Mayor Mike Rama o kontra? Nag-iyahay na man gud og press conference. Dayon ang ilang mga isig ka higalang mga sakop sa media nagsigi na og tira sa pikas kampo. Nganong dili man sila mag-istorya?
Sakto ang punto nga ang angay atimanon karon mao ang kahimtang sa panglawas sa Siyudad sa Sugbo.
Basi sa mga balita, ang Siyudad sa Sugbo nitala og labing daghang mga kaso sa Covid-19 sa tibuok nasud. Nalabwan na sab nato ang Syudad sa Quezon ug ang Syudad sa Davao. Sulod lang sa 14 ka adlaw, niabot og 1,345 ang bag-ong mga kaso sa Covid-19.
Mas daghan kon kini itandi sa 1,050 nga bag-ong kaso sa Syudad sa Davao. Sa Syudad sa Quezon sa kaulohan, dunay 1,005 nga bag-ong kaso.
Makapabalakag maayo ang kahimtang sa Syudad sa Sugbo. Samot nga maglibog kita karon kinsa man ang nagdala sa timon.
Maayo na unta kadtong higayon nga nag-file og sick leave si Mayor Labella ug ni-takeover si Bise Mayor Rama. Mao man kana ang proseso.
Human sa duha ka adlaw, niingon si Mayor nga naayo na siya apan gitambagan sa iyang doctor nga magpuyo una sa balay. Busa nidesisyon siya nga mag-work-from-home.
Karong panahon sa Covid-19, naanad na kita sa niining magtrabaho lang anha sa balay. Masabtan unta kini kon wala kita makakita sa dagway sa mayor dihang nag-online press conference kini.
Alang kanako, ambot lang ninyong nagtan-aw sab sa iyang dagway pag-press conference, angay gyud siyang mag-sick leave. Angay siyang mopahuway aron dali siyang maayo. Makaguba sa imong kredibilidad nga ingon niana ang imong dagway dayon mo-insister ka nga naayo na. Mas maayo sab nga mopakita ka sa imong medical records aron mohilom ang mga kritiko.
Di man unta problema kay kaalyado man ang bise mayor. Makasabot man kana siya kay kauban ra gud mo sa usa ka kampo. Higala ug magkumpare pa gyud.
Nahibong lang gyud ko nganong moinsister dayon sa pagbalik si Mayor Labella. Wa siyay salig sa iyang bise mayor? Di ko mahibong nga mainsulto si Rama sa gibuhat sa mayor.Nganong di man sila maka-istorya gud? Higala man kana sila.
Roque
Lain nakong nahibudngan nganong sa pagkakaron, nanghambog na si Presidential Spox Harry Roque nga mailhan sa kasaysayan nga si Presidente Duterte nakapakgang sa Covid-19 dinhi sa Pilipinas.
Sunod sa Sugbo nga labing daghan sa Covid-19 karon mao man gud ang Syudad sa Davao. Sulbara una ang Covid-19.