NAGSAKA ang numero sa mga positibo sa Covid-19 sa Dakbayan sa Sugbo. Sa taho sa Department of Health (DOH) Central Visayas niadtong Dominggo, Feb 7, dunay 121 ka bag-o nga mga kaso ug dunay 2,096 na nga aktibo nga kaso sa Covid-19 tungod sa nangagi nga kalihokan sa pagselebrar sa Pasko, Bag-ong Tuig, Pista Senyor ug uban pa.
Atong hatagan og gamay lugway ang gipamulong ni Bise Mayor Mike Rama kabahin sa kahimtang karon ni Mayor Edgar Labella unsa ka tinuoray nga kabalaka sa panglawas sa mayor ug sa nagkadaghan nga naigo karon sa Covid-19. Apan dili kalikayan nga magduda ang mga lumalaban sa mayor nga luyo sa kabalaka nga gipakita ni Rama sa panglawas ni Labella duna siyay nagpahipi nga katuyoan.
Gani, nabaniog na nga komedya labina sa mga alalay ni Labella nga nagdali si Rama, nga molingkod pagka mayor ug iya lang gigamit ang nagsaka nga kaso Covid-19 aron dili law-ay paminawon. Si Labella naa ra sa iyang balay nagtrabaho tungod kay gidid-an siya sa iyang doktor nga di usa moipon sa daghang tawo tungod sa impeksyon sa iyang dunggan.
Gihagit ni Rama si Labella nga motug-an sa iyang tinuod nga kahimtang sa panglawas. Wa diay motuo si Rama sa gitug-an na ni Labella sa publiko. Gani, way lipud-lipud gipagawas ni Rama atol sa iyang press conference nga namakak si Labella sa tinuoray nga pagkabutang sa iyang panglawas apan dili siya motug-an sa iyang nahibaw-an.
Igo na lang miingon si Labella ngadto ni Rama nga “ipadaplin sa ang pulitika, higala!” Ituboy ni Labella si Rama nga malakip sa komitiba, nga maoy nag-una sa away batok sa Covid-19. Mohilum kaha si Rama kon mahatagan na siya responsabilidad sa kumbati batok sa Covid-19?
Sudyae ko og sipyat ko sa akong pangagpas nga dili moundang si Rama sa iya na nga gisugdan nga isyu. Ngano? Tungod kay nagkaduol na ang piliay sa Mayo 9, 2022 ug nangita siya og isyu nga masakyan aron pirmi siya nga mogawas sa media. Gani, iyang giklaro sa maong press con nga way makapugong kaniya kon modagan siya pagka mayor. Giusban lang og klaro ni Rama ang dugay na nga nahibaw-an sa tanan nga modagan siya og balik pagka mayor.
Agi og tubag sa banat ni Rama, si Labella igo na lang moingon “ipadaplin lang sa ang pulitika, higala” tungod kay nag-atubang pa man ta sa pandemya sa Covid-19. Kuwang na lang moingon si Labella, walang personalan Mike. Imbis nga ang hisgotan ni Rama ang solusyon sa nagsaka nga kaso sa Covid-19, ang panglawas na hinuon ni Labella ang iyang gipuntariya.
Sa miaging tuig, si Rama ang nitago dihang nikusog ug nidaghan ang takod sa Covid-19 sa dakbayan apan si Labella maoy pirmi nag-opisina aron pagdumala sa sitwasyon. Kasabot namo sa punto sa bise mayor?