Nalingaw kong nagbasa sa post ni Cebu City Councilor Nina Mabatid sa iyang Facebook account nga matod pa niya nga adunay “ungo” sa City Hall. Kining Ungo, paryente ra ni sa wakwak, balbal, aswang ug tirong. Mao ni panghadlok namo ni Nanay kaniadto didto sa probinsiya kon dili pa mi manghimasa ug mosaka sa balay inig gabii na. Pagngon ni Nanay nga “hala dili pa mo mosaka, naay ungo diha.” Aw, sus, maglumba dayon mig saka sa balay. Bisan walay himasa, bukot dayon sa habol. Ahos ra kuno ang pang-alkontra anang ungo, Konsehal, matod pang Atty. Eddie Barrita.
Mao ni ang post ni Konsehal Mabatid: “Unsa man mabuhat nako nga konsehal ra man ko? I have solutions to the problem pero wa man tagai og bili ang elected official. Sila-sila ra may plano, puro ra ba palpak. Kabalo ba mo nga naay ‘Ungo’ sa City Hall nga maoy nagbuot-buot sa tanan gikan sa pagpadagan sa City Hall, sa mga supplier sa bugas ug tigdiktar sa mga ‘puppet’ councilors unsay buhaton sa budget, kinsay tagaan ug kinsay dili.’
Dugang pa ni Mabatid: “Dili man Covid iyang concern, mas nagbantay siya sa kuwarta sa gobiyerno. Ngano kaha? Kamo na lang bahala, basta ako naningkamot ko og ako hatag og serbisyo sa mga tawo labi na sa mga pobre gamit sa akong kaugalingong kuwarta. Hinuon, naa man sad nanglihok nga pulitiko, grabe kunohay nitabang pero gamit sa kuwarta sa gobiyerno pero kon makagasto morag ilang kuwarta. Puwera gaba.”
“Ambot ngano hadlok kaayo ni sila nga motabang ko? Hadlok sila nga naa koy mabuhat nga maayo. Ug naay ayuda halos dili ko pahibaw-on not unless moreklamo ko. Sorry, I am not a puppet councilor. (Buot ipasabot sa ‘puppet’ kanang sunod-sunoran lang). Mo-barug ko kon unsay insakto. Ayaw paghuwat mabulgar mo kay dili ra ba ko mahadlok mosulti sa tinuod, bahala na og pahawaon ko ninyo. Enough. Hadlok mo og Ungo? Ako dili.”
Morag tulukibon kaayo ning maong pamahayag ni Mabatid. Kinsa man kaha kining “Ungo” nga iyang gisumbingay? Duda ko dili ni siya elected official. Kanhi elected official ba kaha apan maoy dakog papel sa kampaniya o bisan karon sa pagdumala sa City Hall. (bobbygnalzaro@gmail.com)