HAGONOY, Davao del Sur -- Wala na kaabot og Valentine's Day ang mag-live-in partner human giunay og patay sa lalaki ang babaye didto sa ilang pinuy-anan sa Purok 6, Barangay Sinayawan, alas 11 sa buntag, Lunes, Pebrero 8, 2021.
Nasayran nga human nga gipatay sa 25 anyos nga lalaking ang ka-live-in, nagpakamatay sab kini.
Sa taho gikan sa Hagonoy Municipal Police Station, gihulagway nga naabtan nilang wa na'y kinabuhi sila si Christopher Unda, caretaker sa packing house sa Banana Grower Plantation nga kilid lang sa ilang balay, ug kapuyo niini nga si Trisha Mae Magsalin, 22.
Giingong nakaangkon og samad sa liog nga bahin ang babaye gamit ang wala pa masayring mahait nga butang.
Ang tag-iya sa packing house nga si Castillo Te maoy nakadiskubre sa nagbitay nga si Christopher human gihiktan niini og nylon rope ang iyang liog ug ang pikas tumoy nakahikot sa cable.
Gisuwayan pa nila pagluwas ang biktima sa tabang sa mga kaubanan niini apan pakyas gumikan kay patay na kini.
Sa wa pa mahitabo ang insidente, makit-an pa ni Raul Arobo Rojo, 39, kauban sa trabaho, si Christopher banda alas 10 sa buntag nga naggunit sa nylon rope ug dihang gisita niini, mitubag kini kaniya nga "maghikog ko kay napatay nako akong asawa."
Gumikan sa maong testimonya, natultulan dayon sa kapulisan ang nahimutangan ni Trisha nga ilang naabtan didto sa lawak sa magka-live-in partner kinsa naglunang na sa kaugalingong dugo samtang nagbuy-od sa salog.
Mihimo dayon og imbestigasyon ang mga sakop sa Scene of the Crime Operatives (Soco) sa dapit ug gidala ang patay nga lawas sa babaye ngadto sa punerarya.
Apan, di pa masulti sa kapulisan kon unsa ang motibo kon nganong gipatay sa lalaki ang iyang ka-live-in unya nagpakamatay sab siya.