Kataw-anan ra pod ning duha ka mga mayor sa Bohol.
Nagsugod ang ka-bibo sa dihang nag-issue og memorandum ang usa ka mayor (Mayor A) nga nag-dili sa mga residente sa maong lungsod sa pagbisita o pag-adto sa laing lungsod. Kadtong mosupak sa maong memorandum, i-kwarantinas sulod sa 14 ka adlaw.
Gihimo kini sa mayor tungod sa pagsaka sa gidaghanon sa Covid cases sa maong lungsod. Unsay gihimo sa mayor (Mayor B) sa pikas lungsod?
* * *
Matod sa balita, mopagawas og order si Mayor B nga magbutang og mga checkpoint aron mababagan ang mga residente sa lungsod ni Mayor A sa pagsulod sa lungsod ni Mayor B.
Susmariyusep.
Lisod pod espilingon ning balitaa.
* * *
Mahimo ba kaha nga babagan ang mga tawo sa pag-adto sa usa ka lugar pinaagi lang sa kasugoan sa mayor?
Mao kini ang gimando sa atong Philippine Constitution.
“The liberty of abode and of changing the same within the limits prescribed by law shall not be impaired except upon lawful order of the court. Neither shall the right to travel be impaired except in the interest of national security, public safety, or public health, as may be provided by law.”
Naapil ba sa exception ang order sa usa ka mayor?
* * *
Mogawas nga mora’g mga bata ang nag-away.
Kinahanglan pa ba gyod nga mag-issue og memorandum si Mayor A nga mag-bawal sa katawhan sa iyang lungsod sa pag-adto o pagbisita sa lungsod ni Mayor B?
Kinahanglan pa ba gyod nga sagpaon niya og kwarantinas nga 14 ka adlaw ang moadto sa lungsod ni Mayor B?
Nganong i-single out man niya ang lungsod ni Mayor B nga daghan man sab nga mga COVID incidence sa ubang mga lungsod?
Kon ingon ani ang kinaiya sa tanang mayor sa Bohol, unsa kaha ang resulta niini?
* * *
Didto sa Jagna, nagubot ang katawhan sa dihang miuli sa Bohol gikan sa Cebu ang bise mayor sa maong lungsod kauban ang iyang asawa.
Imbes mosakay sa ambulansiya sa lungsod, misakay sila sa laing sakyanan, miadto sa lain-laing mga lugar sa Tagbilaran, apil ang Kapitolyo, usa pa mi-uli sa Jagna.
Matod pa, walay travel authority ang bise mayor.
Kon tinuod kini, matawag ba og APOR ang maong opisyal sa lungsod?
Walay kwarentinas nga nahitabo sa bise mayor hasta ang iyang asawa.
Hangtod karon, wala pa mahibaw-i kon unsay aksyon sa Bohol, hasta ang LGU sa Jagna.
Kon kahinumdoman, abtik ang Kapitolyo sa pag-aksiyon sa dihang ang mayor sa Panglao ang mihimo og susama nga kalihokan.
Gani, gi-imbestigar man kini sa PNP sa Bohol human momando ang gobernador.
Gipasakaan man gani og kaso sa opisina sa provincial prosecutor.
Kining gihimo sa bise mayor sa Jagna, unsa kaha ang buhaton sa gobernador niini?