Tulisan namatay human tag-iya sa convenience store misukol kaniya Lunes sa alas 9:30 sa gabii sa Brgy. Yati, lungsod sa Liloan, amihanang Sugbo.
Si Roel Narvasa, hingkod, taga Brgy. Lanipga, lungsud sa Consolacion, namatay diha-diha human napusilan ni Teodoro Hatamosa, 48, minyo, nagpuyo sa nahisgutang lugar, market inspector sa lungsod sa Consolacion.
Si Major Danilo Colipano, hepe sa Liloan Police Station nga nahinabi sa Superbalita Cebu, nagkanayon nga si Narvasa sakay sa motorsiklo nga wa pa mailhi ang driver.
Kalit nga niabot mikanaog, dayon miti-on sa iyang armas ngadto kang Hatamosa, kinsa nagtalikod niadtong higayuna.
Mideklarar kinig tulis hinungdan nga gihatag ni Hatamosa ang halin nga P25,00.
Human niini, nagdali nga nibalik si Narvasa ug nisakay sa nagpaabot nga motorsiklo.
Wa maglangay si Hatamosa, iyang gipusil ang mga tulisan.
Nibawos si Narvasa, apan nikagar ang armas hinungdan nga naigo siya ug nahibilin.
Daling misibat ang kauban nga gikatahong nagsul-ob sa t-shirt nga yellow.
Si Narvasa wa na madala sa tambalanan, namatay sa iyang samad sa lawas.
“Maayo gani wala naratol si Hatamosa. Gipasagdan lang niya nga nagkuha sa cash si Narvasa nga kita sa tindahan. Dihang pagsibat, nakalugar siyag kuha sa iyang armas,” sumala ni Colipano.
Narekuber sa kapulisan ang armas ni Narvasa nga .357 caliber revolver nga dunay tulo ka mga bala.
Samtang ang armas ni Hatamosa legal kay kompleto sa mga dukomento..
Si Colipano niingon nga si Narvasa ug kauban niini unang nanulis sa lungsod sa Consolacion.
Ilang nasuta nga ang maguwang niini mao si Real Narvasa, number 1 most wanted person sa Consolacion nga napatay niadtong 2019 sa Balamban.
Sa pagkakaron, nagpadayon ilang imbestigasyon sa kaso aron pag-ila sa kauban niini.
Si Major Verniño Noserale, hepe sa Consolacion Police Station nga nahinabi sa Superbalita Cebu, nagkanayon nga ang duha ka mga tulisan ilang gigukod mga alas 7 sa gabii human nanulis sa usa ka sari-sari store sa Tayud.
Ang biktima giilang si Florest Pineda, 41, kinsa nakuhaan og P2,000 nga cash.