Lima ka luxury cars ang gipangguba sa Bureau of Customs (BOC) Central Visayas nga kabahin sa kasaulogan sa ika-119 nga anibersaryo sa BOC kagahapon, Pebrero, 9.
Ang maong mga sakyanan nalakip sa 17 ka luho nga sakyanan nga nasakmit ug gipisat-pisat sa maong ahensiya lukop nasud.
Sumala pa sa nangulo sa Management and Audit Analyst, Atty. Marc Anthony Patriarca, nga lakip ang buhatan sa BOC Central Visayas sa gipahigayon nga simultaneous destruction sa mga na-imbargo nga sakyanan.
Ang mga sakyanan nga gipisat-pisat naglangkob sa Mercedez Benz, Ferrari, Ford Ranger ug laing luxury car nga nasakmit sa BOC niadto lang miaging tuig.
Ang maong luxury vehicles naabot sa Pilipinas gikan sa gawas sa nasud apan pulos kuwestiyonable ang mga papeles niini.
“Kanang upat ang nakabutang mga personal effects samtang kining usa car accessories and then it find out sa atong x-ray nga adunay makita nga tibuok nga porma sa sakyanan. So it means smuggle gyud siya,” matod pa ni Patriarca.
Gipugngan sa BOC ang pangalan sa nanag-iya sa maong mga sakyanan.
Gipasabot sa taga-BOC nga subay kamanduan ni Presidente Rodrigo Duterte nga kinahanglan dili mamahimong gamiton ang mga nakompiska nga mga sakyanan.
Gibana-bana nga moabot ngadto sa P30 milyones ang kantidad sa mga mahalon nga sakyanan ang gipangguba. (BBT)