“No swab test, no tsula.”
Kini maoy pahibawo ni P/Lt. Colonel Wilbert Parilla, deputy city director for operations, Cebu City Police Office (CCPO).
Nanawagan sab ang maong opisyal ngadto sa mga single o kadtong adunay gikatakda nga date sa Pebrero 14, Valentine’s Day nga maglikay sa pakig-date ngadto sa wa pa nila mahimamat. Apan kon makapakita og resulta sa RT-PCR test ang uyab niini mahimo ra nga mag abot sila sa usa ka lugar kin aron pagsiguro nga Covid-free ang ika-date.
Ang opisyal mitambag nga niadtong adunay date nga wala pa magkakita-sukad diin mas labing maayo nga virtual lang una ilang relasyon samtang wala pay Covid vaccine.
“Ayaw lang sa mo og meet pero kung naa siyay dala nga negative result sa swab test, aw go ta diha,” matod ni Parilla.
ALERTO SA VALENTINES
Ang kapulisan sa Siyudad sa Sugbo nangandam na karong Pebrero 14 adlawng Domingo diin mga motel ug hotel sa dakbayan gipabantayan aron walay mga menor de edad ang makasulod.
Lakip sa ilang bantayan ang mga kan-anan ug mga imnanan gikan sa adlawng Sabado ug Domingo (Pebrero 13 – 14) tungod sa posibilidad nga magdasok ang mga tawo sa maong mga establisemento nga mag-date.
Matod ni Parilla deputy city director for operation sa Cebu City Police Office nga ang kapulisan sa siyudad dili mga “kill joy” niadtong adunay karelasyon nga manuroy sa maong adlaw apan gikinhanglan nga ipatuman ang health protocol.
Iyang gipasabot nga ang Covid anaa sa bisan asang dapit og angayang bantayan sa managhigugmaay.
OPLAN BULABOG
Gibutyag ni Parilla nga ang mga police stations molusad ug sub-sub nga check points sa kadalanan ug Oplan Bulabog sa mga restaurants ug mga imnanan aron ipatuman ang minimum health standard.
Pahinumdum sa kapulisan nga kon magsaulog sa adlaw sa kasing-kasing labing maayo nga mosayo sa mga kan-anan aron dili maabtan sa curfew ug dili mo-order og ilimnong makahubog tungod sa liquor ban.
“We will remind sa atung katawhan that this coming Saturday or Sunday the liquor ban is still implemented basin unya og makalimot sila, our advise that just do it in private nalang didto nalang sa ilang panimalay para mas safe og layo ra sa Covid ug layo sa disgrasya,” pahimangno ni Parilla.
Gimandoan usab sa CCPO ang 11 ka police station sa siyudad nga makig alayon sa mga motel ug hotels nga naa sa ilang hurisdiksyon.
Matod ni Parilla nga kinahanglan nga pahimangno-an ang maong mga establisamento nga dili modawat sa ilang guest nga adunay dala nga menor de edad nga babaye. /