MAAYONG adlaw na pod sa atong mga suki sa tanang suok asa man mo nahimutang karon.
Laing semana na sad ang atong ginaatubang, nagpasabot nga nagkaduol ta sa adlaw nga gisaad sa atong mga opisyal nga moabot ang bakuna kontra Covid-19 sa atong nasud ug ang umaabot nga eleksiyon.
Daghan na ang nagapanagana ug nagapangutana kon pinugsanay ba gyud nga bakunahan ang usa ka tawo sa anti-Covid vaccine?
Nabahin karon ang hunahuna sa katawhan tungod samtang nagapadasig ang kagamhanan nga magpabakuna ang katawhan, duna pod grupo nga anti o kontra sa bakuna.
Niadtong nagkapuliki pa ang mga doktor pagdiskobre unsay tambal nga isanta sa pagkuyanap sa virus, mga katawhan naghandom nga unta duna nay mamugna nga tambal (vaccine) apan karon nga naa na, daghan na pod ang nangampanya nga dili magpabakuna kay makadaut hinungdan nga daghan ang mibati'g katalaw.
Ang ubang mga frontliners magpabakuna na lang kuno tungod naa man sila nagaserbisyo sa gobyerno. Ilang gibati nga daw wala silay kapilian kay mga trabahante sila nga ginasuweldohan gikan sa panudlanan sa kagamhanan.
Wala na ba ang atong kagawasan karon?
Dako ang epekto sa katawhan sa pagkausab sa mga pulong gikan sa baba ni Presidente Digong nga kon moabot na ang bakuna, una siyang mopaturok niini aron ipakita sa katawhan nga dili ta angay mahadlok.
Sa takulahaw lang, nabalit-ad ang iyang gipamulong ug miingon nga ipauna niya ang mga frontliners kay kinahanglanon kaayo nila ang bakuna.
Iyang gidugang pagsulti nga atubangan sa kamera siya magpabakuna aron makit-an sa katawhan apan karon wala nay kamera, dili na kay sa lubot kuno niya ipaturok kon magpabakuna siya. Mas maayo pa unta nga wala na lang siya nanaad nga dili man diay niya buhaton.
Hinuon si Senador Christopher Bong Go misaad nga magpabakuna siya ug ipakita sa publiko.
Diri ta sa natad sa sports ug politika.
Nabaniog mga naghandom sab si Senador Emmanuel "Manny" Pacquiao nga modagan sa 2022 kay buot mahimong presidente sa nasud. Una kining nasulti ni Bob Arum. Wala sab gilimod ni Pacman nga naghandom siya sa pagkapangulo apan sa iyang mga gipakita nga pagkagalante ug pagsuporta sa daghang kalihukan, apil.ang sports ug panghatag og ayuda, daghan ang nagtuo nga namugaspugas na si Pacman.
Karong bag-o, giingon nga iyang gipangandaman ang iyang pakigbugno, Pacquiao-Garcia kuno ang atanganan nga bugno.
Tungod mipasibaw ang coach ni Garcia nga dili siya interesado nga makigharong ang iyang boksidor nga si Ryan Garcia kang Pacman, mitumaw ang mga panghunahuna nga tingali'g Pacquiao-Garcia tandem ni sa 2022!
Kinsa man nga Garcia ang puwede himuon ni Pacquiao nga bise presidente ugaling modagan siya?
Ilado nga pamilya ang Garcia sa politika nga nagsukad sa Cebu.
Gani man, gipakita ni Cebu Governor Gwendolyn Garcia ang iyang isog nga baruganan sa isyu sa Covid-19. Posible kini nga mahitabo sa natad sa politika. Atangi kay atong ipadayon sunod semana.