GIKLARO sa Philippine Institute of Volcanology and Seismology (Phivolcs) nga ang Makilala-Malungon nga parte sa Cotabato fault system ang milihok hinungdan nga nahitabo ang magnitude 4.8 ug 6.1 nga linog niadtong Dominggo, Pebrero 7, 2021.
Sumala ni Phivolcs Director Renato Solidum nga nahinabi sa telepono, nga dili ang Tangbulan fault system nga nahimutang sa Davao del Sur ang hinungdan sa linog nga nasinati sa daghang parte sa Mindanao.
Unang migawas ang balita nga milihok ang Tangbulan fault ug maoy hinungdan sa kusog nga pagtay-og.
Gitataw ni Solidum nga ang Makilala-Malungon fault nalakip sa Cotabato fault system ug maoy pinakataas kung diin moabot sa 65 kilometros diin mahimong maka-generate og magnitude 7.2 nga linog.
Dugang sa opisyal nga gilauman niining aduna pay mas kusog nga linog gumikan kay wa kini makahunat og sakto mao nga hayan nakapundo kini og enerhiya apan di mahibaw-an kung kanus-a kini mahitabo.
Tuig 2019, dihang nahitabo ang kusog ug sagunsong pagtay-og gikan sa manag-silingang fault system ug mibalhin sa uban pang faultline diin gitawag nga "Domino effect."
Subay sa guidelines sa Phivocs, kung makasinati og hinay nga mga pagtay-og sa usa ka lugar, aduna’y posibilidad nga makasinati og hinay nga linog o posible sab nga adunay mahitabong mas kusog nga mga pagtay-og. (Orlando B. Dinoy)