Nakahiagom ang Brooklyn Nets og tulo ka sunodsunod nga pilde human sila gipukan sa Detroit Pistons, 111-122 sa nagpadayong duwa sa National Basketball Associations.
Apan nahitabo kini sanglit dili kumpleto ang ilang big-3 nga gilangkuban nilang James Harden, Kyrie Irving ug Kevin Durant.
Ang 6”10’ power forward nga si Durant padayon nga nagpa-ubos sa quarantine gumikan sa health ug safety protocol sa NBA batok sa Covid-19 bisan paman kon negatibo ang iyang mga Covid-test.
Si Jerami Grant nirehistro sa iyang career high 32 points ug ilang gipahimuslan ang pagkawagtang sa top scorer sa Nets.
Ang kadaugan sa Pistons maoy nagputol sa ilang upat ka sunodsunod nga pilde kinsa nipakutas sa Los Angeles Lakers dihang niabot og double overtime ang ilang duwa apan nisurender ra gihapon ang ilang koponan sa kamandag ni LeBron James.
Si Harden, 24 puntos ug 12 assists kauban si Irving, 27 puntos kinsa adunay angol sa iyang tudlo maoy nigiya sa Nets aron makadikit ug makasugakod sa opensa sa Pistons hangtod nga nahutdan sila og kusog.
Ang Nets gilubong sa Piston og 20 puntos sa second quarter apan gumikan sa ilang kasinatian, ilang gikaon ang labaw ug niabot nalang og 2 puntos sa third quarter apan napasulod ni Grant ang iyang tira sa tres hinungdan nga nainat ang labaw ngadto sa 94-86 pagkahuman sa third quarter.
Si Nets head coach Steve Nash wala mo-excuse sa ilang kapildehan gumikan sa wala pagduwa ni Durant inay iyang gidasig ang iyang mga player nga maninguha ug daugon ang ilang sunod nga duwa.
Ang Brooklyn maoy nahimong sentro sa hisgotanan sa NBA human nitapon kanila si Harden pinaagi sa usa ka blockbuster trade ug ang pagkaumol sa big 3 sa Nets apan si Irving nihulagway human sa ilang sunodsunod nga pilde nga ang ilang Nets usa lang ka average team sa NBA. (PAC)