Usa ka ex-convict patay human gipauwanan og bala sa riding-in-tandem sa Purok Bayabas, Barangay Tuyom, Dakbayan sa Carcar, alas 8:00 sa gabii.
Si Wilfredo Ardiente Jr., 38, dunay kapuyo, ex-convict sa kaso sa gidiling druga ug taga Sitio Langud, Barangay Sirao, Dakbayan sa Sugbo.
Si Police Corporal Aogie Noel Espinoza sa Carcar Police Station nga nahinabi sa Superbalita Cebu nagkanayon nga si Ardiente sakay sa ilang sakyanan uban sa kapuyo padulong sa ilang panimalay.
Nihunong sila sa usa ka sarisari store sa maong dapit.
Ang duha ka mamumuno sakay sa motorsiklo nga nagsunod kanila.
Nihunong sab sila ug nanganaog sa motorsiklo dayon nipauwan og mga bala ngadto ni Ardiente, ug nisibat dayon.
Si Ardiente gidala sa usa ka tambalanan sa Carcar apan patay na kini pag-abot didto.
Si Espinoza nagkanayon nga si Ardiente gikatahong nakagawas sa Cebu City Jail niadtong Disyembre 2020 sa kaso sa illegal drugs. (GPL)