PANDAY nga wa makadawat nga gibuwagan sa iyang uyab nga babayeng minyo samtang nag-angat ang Valentine’s Day nipatay sa iyang hinigugma sa ala 1:45 sa kaadlawon, Pebrero 10, 2021 sa Brgy. Lanao, Lungsod sa Pilar, mga Isla sa Camotes.
Si Genevib Villagonzalo Cacolan, 28, namatay sa tambalanan tungod sa mga samad dinunggaban.
Ang iyang bana nga si Lemar Panto Cocalan, 35, naangol human giapil og dunggab kay nanalipod sa iyang asawa.
Si Genevib bag-o lang nauli sa ilang balay human kini nakigtaban ug nitago sa usa ka isla uban sa suspek nga giilang si Jess Capillanes, 31, taga Barangay Esperanza, Lungsod sa Pilar.
Si Capillanes ug ang drayber sa motorsiklo nga iyang gisakyan sa pagsibat nga si Robert Mesias nadakpan sa kapulisan atol sa hot pursuit.
Si Police Staff Sgt. Nelson Pantoja, imbestigador sa Pilar Police Station nga nahinabi sa Superbalita Cebu, nagkanayon nga love triangle ang motibo sa krimen.
Sumala pa ni Pantoja nga sila si Genevib ug Capillanes nagkarelasyon nga wa masayod ang bana.
Giingong bag-o lang nga nipauli si Genevib sa ilang balay human sila magtago-tago ni Capillanes sa pikas isla.
“Nagkauli man sila sa iyang bana gud. Gituldukan na niya ilang relasyon unya kining suspek gusto gihapon ba, gimingaw guro. Di makadawat nga mag-inusara sa Valentine’s Da,y gisulod niya sa panimalay gidunggab,” duhang ni Pantoja.
Bisan sa iyang gibuhat, si Genevib gidawat gihapon ni Lemar sanglit duna silay tulo ka mga gagmay nga mga anak.
Sa wala pa ang krimen, ang pag-umangkon ni Capillanes nga wa nganli ni Pantoja, nibutyag sa kapulisan nga nag-inom sila sa iyang uyoan.
Gipahibawo siya ni Capillanes nga magpahatod siya sa Brgy. Lanao, sa panimalay sa iyang hinigugma nga si Genevib.
Iyang gihatod si Capillanes ug nipauli siya pagkahuman, apan siya nakugang dihang pagkabuntag, iyang nahibaw-an ang nahitabo sa magtiayong Cocalan.
Matod ni Pantoja nga si Genevib natulog uban sa iyang bana ug mga anak dihang nakabantay siya nga daw dunay tawo nga nisulod sa ilang balay.
Sa iyang pag-abli sa pultahan aron susihon ang kasikas, kalit nga gidunggab si Genevib ni Capillanes sa tuong bahin sa lawas.
Si Lemar nga nakabantay nitabang sa iyang asawa, apan siya na usab ang gidunggab ni Capillanes sa tuo nga ilok ug hawak.
Human niini, nisibat si Capillanes sakay sa motorsiklo nga gimaniho ni Mesias.
Ang mga biktima gidali sa pagdala sa Rural Health Unit sa lungsod apan si Genevib namatay.
Kasong murder ug attempted murder ang ipasaka batok kang Capillanes.