COTABATO CITY -- Gibombahan sa militar ang kampo sa mga teroristang Bangsamoro Islamic Freedom Fighters (BIFF) sulod sa lima ka oras (gikan 9 sa buntag hangtud 2:00 sa hapon) Miyerkules, Pebrero 10, 2021.
Sumala kang 6th Infantry (Kampilan) Division Chief ug Joint Task Force Central Commander Major/General Juvymax Uy nga milusad og air-to-ground assault ang militar batok sa BIFF didto sa Barangay Pilar, South Upi, Maguindanao Province.
Gipangunahan ang "focused military operation" sa puwersa sa 57th Infantry (Masikap) Battalion, Philippine Army, Field Artillery Battalion ug Philippine Air Force (PAF).
Migamit ang militar og 105 mm Howitzers Cannon ug duha ka Attack Helicopters sa PAF.
Tungod niini, dunay gikataho nga siyam ang patay sa bahin sa BIFF ug daghan ang naangol subay sa pamahayag sa mga bakwit apan padayon pa kining gisuta sa militar.
Kahinumdoman nga sunod-sunod nga nanghasi ang BIFF sa mga barangay sa Itaw, Kuya ug Pilar niadtong miaging bulan.
Gisunog sab sa mga terorista ang kabalayan sa mga namakwit nga mga sibilyan.
Gawas niini, gibanhigan sab si South Upi Mayor Reynalbert Insular ug Municipal Councilor Basit Kamid.