NAKATALA og 61 ka mga bag-ong kaso sa coronavirus disease (Covid-19) ang Cagayan de Oro, labaw sa katunga sa kanila mga trabahante nga mipositibo sa Covid-19 gikan sa Manila-based construction company, sumala sa report sa City Health Office Huwebes, Pebrero 11, 2021.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3,572.
Sumala ni City Health Officer Dr. Lorraine Nery, sa 61 ka mga bag-ong lokal nga kaso, pito ang mga close contacts sa mga pasyenteng nagpositibo sa coronavirus, duha ang mga lokal authorized persons outside residence (Apors), 51 ang mga local index nga mga kaso, ug usa ang patay.
Sa 3,572 nga kinatibuk-ang kaso sa Covid-19 sa syudad, 422 ang mga returning overseas Filipino workers/locally stranded individuals (ROFs/LSIs) ug 3,150 ang mga local transmissions.
Matud ni Nery, sa 3,150 nga mga local nga kaso, 186 ang mga persons deprived of librety, 1,637 ang mga local index cases, ug 1,327 ang mga local cases with link.
Ang Cagayan de Oro naay 339 ka mga active cases, 59 niini na-admit sa Northern Mindanao Medical Center ug uban pang mga ospital sa syudad, 276 ang mga outpatients, ug upat ang mga ROFs/LSIs.
Nakatala usab og 10 ka mga Covid-positive nga mga kaso nga karon naka-recover. Anaa na karon sa 3,057 ang ihap sa mga nakarekober nga mga kaso sa dakbayan.
Sa maong numero, 300 ang mga LSIs, 117 ang mga ROFs, ug 2,640 ang mga lokal nga kaso (community: 2,228; Apors: 412).
Ang ihap sa mga namatay sa Covid-19 sa syudad naa sa 176.