Masulub-on ang pagsaulog sa adlaw sa mga kasingkasing sa mga pamilya sa duha ka biktima nga nangamatay sa disgrasya sa dalan sa Lungsod sa Pinamungajan sa alas 11:30 sa buntag, Pebrero 11, 2021.
Namatay diha-diha ang duha ka mga driver sa motorsiklo human sila nalatayan sa truck nga nisugat kanila sa dalan sa Barangay Pandacan.
Grabe ang kadaut sa lawas nila ni Vicky Pepito, 43, taga Barangay Arpili, Lungsod sa Balamban, dealer sa Personal Collection sa Dakbayan sa Toledo, ug si Jasper Campo, hingkod, lumad taga Barangay 4, Poblacion, San Carlos City, Negros Oriental ug nagpuyo sa Toledo diin usab kini nag trabaho isip collector.
Subay sa pakisusi sa kapulisan sa lungsod pinaagi ni Police Corporal Jonas Gonzales, paingon na unta mopauli gikan sa pag-deliver og balas ug graba ang truck nga gimaneho ni Gilbert Tabañag, 43, kauban niini ang iyang anak nga maoy truckboy.
Samtang sila si Pepito ug Campo anaa sa bali nga direksyon nga nagmaneho usab sa ilang tagsa ka mga motorsiklo.
“Ang truck going ni sila northbound. Unya opposite lane nila ang duha sad ka motor gikan sa Toledo padung sa south. Unya ang kaning truck naa ni siyay gisundan nga motor unya iyang gilihayan. Ni overtake siya, pag overtake niya ni apply siyag brake kay murag nalapas siya sa lane. Pero ang brake nibasiyo mao to ni diretso-diretso na gyud siya sa pikas lane diin iyang nadasmagan ang duha ka motor,” matod ni Gonzales sa interbyu sa Superbalita Cebu sa Pebrero 11.
Sukwahi sa pangagpas sa mga residente nga nakakita sa hitabo, giklaro ni Gonzales nga dili buntis si Vicky.
Gitanggong sa Pinamungajan detention cell si Tabañag.
Nalakip sa mga kaso nga atubangon niini mao ang reckless imprudence resulting to double homicide ug damage to properties.
Awhag sa kapulisan sa mga motorista, “ang disgrasya naa gyud na pirmi. Kon kita mag dinanghag ta, duol ra ta sa disgrasya. Mao na nga safety gyud unahon. Dili maggara-gara sa karsada kay siguro gyud na nga duha ra’y paingnan mamatay or ma injury.”