Ipaubos sa Covid-19 test ang 1,500 ka mga taxi driver nga nagbase ug nagbiyahian sa Dakbayan sa Sugbo sugod sa Pebrero 16, 2021.
Matod ni Mayor Edgardo Labella, dako og ikatabang ang pagsuta sa kahimtang sa panglawas sa mga taxi driver hilabi na kon adunay asymptomatic sa coronavirus disease (Covid-19) aron dili na
makapanakod, labina sa ilang mga pasahero.
Ang gamiton sa pag-test kanila mao ang real-time reverse transcription polymerase chain reaction (RT-RTPCR) test aron dali ra ang resulta ug makabalik dayon sila og pamasahero kon negatibo ang resulta.
Ang mapalgang positibo ipaubos sa quarantine sulod sa 14 ka mga adlaw sa barangay isolation centers (BIC) o quarantine facility sa Siyudad.
Ang di magpa-Covid test posible nga di tugtang makabalik og pamasahero.
Matod ni Labella nga bisan kon wa pa mokunhod ang gidaghanon sa mga nataptan sa maong sakit, diin sa Enero nag-average na og three-digits, di gihapon kini angay nga ika-alarma.
Siya padayon nga niawhag sa katawhan sa pagsunod sa mga lagda batok sa maong sakit. Ang Cebu City ilawom sa general community quarantine (GCQ) hangtod sa Pebrero 28.