Sa gustong masayod sa resulta niadtong pag-atake sa mga supporter ni kanhi US president Donald Trump sa Capitol Hill diin mahimutang ang buhatan sa mga kongresita ug senador, ania ang update.

Nahitabo kadtong pag-atake sa dihang giawhag sila ni Trump nga moadto sa maong dapit diin nagpundok ang mga kongresista ug senador sa usa ka joint session aron sa pag-ihap sa botos sa college electors. Ang electoral college votes gikompirmar na sa tanang 50 ka mga states, apil na sa Washington, DC.

Atong nasayran nga gihimo ni Trump ang tanang paagi aron siya magpabilin sa White House apil na ang pagpasaka og daghang kiha nga ang tanan gibasura sa korte.

Kining pag-ihap sa electoral votes maoy katapusang proseso diin base niini iproklamar ang mga mananaug sa pagka-presidente ug bise presidente. Basi sa electoral college votes, midaug si Democratic candidate Joe Biden sa 306 botos itandi sa kang Trump nga 232 botos. Si Bise Presidente Mike Pence (R), isip presiding officer maoy miproklamar kang Biden sa pagka-presidente ug Kamala Harris pagka-bise presidente.

Ang tumong ug tuyo sa mga dumadapig ni Trump nga dili tumanon kadtong maong botos sa college electors pinaagi sa pagprotesta sa resulta sa ubang mga states. Buot ni Trump nga si Pence musopurta sa iyang tuyo aron siya gihapon maoy i-proklamar nga presidente.

Tungod sa maong hitabo, gipasakaan og impeachment case si Trump sa US House of Representatives apan wala matagad dayon sa Senado kay wala silay session niadtong panahuna. Niadtong Miyerkules sa hapon (oras sa Pilipinas) gisugdan ang debate mahitungod sa constitutionality sa pag-impeach sa usa ka presidente nga wala na sa gahum. Human sa upat ka oras, mibotar dayon ang mga senador diin 56 ang nagtuo nga nasubay sa Batakang Balaud ang impeachment samtang 44 ang wala mouyon.

Niadtong Huwebes ug karon mag-debate na sila kalabut sa maong kaso. Sa Sabado mo-break sila ug mubalik pagka-Dominggo. Magdebate na usab kon tugotan ba ang pagpresentar og mga testigos. Human sa presentasyon sa mga ebedensiya, dunay closing remarks. Human niini ang botasyon kon sad-an ba si Trump o dili.

Nagkinahanglan og labing minus 67 ka mga senador nga mubotar nga sad-an ang kanhi presidente. Mao kini dakung problema sa Democrats kay 50 ra sila ka buok. Bisan kon adunay unom ka mga Republicans nga moabin kanila, layo ra gihapon kini sa gikinahanglang 67 botos.

Kon di makitang sad-an si Trump, di usab makapasaka og resolution ang Democrats nga mag-disqualify kaniya sa paghupot og importanteng pwesto sa gobiyerno. Ubos sa Former Presidents Act hatagan usab ang kanhi presidente og security detail, pension ug yearly travel allowance nga mokabat ang tanan og minilyon ka dolyar.