Dihay tawo nga nakasuroy sa usa ka lugar nga gidungog nga daghan ang mga ungo. Aron maklaro, nangutana siya sa usa ka tiguwang nga nag-inom og tuba sa tindahan, “Noy, tinuod nga daghang ungo dinhi?” Tubag sa tiguwang, “Sa una daghan. Karon wa na. Nahurot namo og sumsom sa tuba.”
Daghan gihapong motuo ining ungo. Gani, daghang mga kaso sa oral defamation nga miabot sa korte kay ang kihante ginganlan og ungo. Sa usa ka kaso, ang kihante niingon nga wa siya nganli og ungo sa akusado apan nisiyagit sa mga silingan nga nagtuwad siya.
Sumala pa sa mga matuo-tuuhon, magtuwad ang mga ungo. Apan ang akusado giabsuwelto sa korte. Matod pa niya, wa siya moingon nga nagtuwad ang kihante. Ang iyang gisiyagit sa mga silingan, “Atong tabangan ang kihante kay nahapatuwad.”