GISAULOG karon sa atong kaigsuonang Chinese ang Chinese New Year. Apan ang kasaulogan karon dili siguro susama sa nangaging katuigan gumikan sa pandemya. Gidili gihapon ang dagkong mga tapok-tapok. Kung Hei Fat Choy (Happy New Year)!
Ang Chinese New Year dugay nang panahon nga gisaulog sa atong kaigsuonang Chinese. Mokabat na sa 3,800 ka tuig. Ang origin niini atong mahanduraw pinaagi sa pagtuo-tuo sa mga Tsino sukad pa sa Han Dynasty sa 202 BC ngadto sa 220 AD sa dihang si Emperor Wudi mimando nga ilang sundon ang lunar calendar.
Ang pagsaulog sa Chinese New Year adunay kalambigitan sa agrarian society o pag-uma sa mga Tsino niadtong kanhiay nga panahon. Ang karaang mga Tsino nihulagway sa ilang pagpananom ug sa ilang pagselebrar isip pasalamat sa ilang maayong pag-ani o harvest. Mao nga magpasalamat sila sa ilang gituohan nga ginuo.
Mao man ni ang mga pagtuo god sa mga tawo sa kanhiay nga panahon. Sumala god anang mga ritual sa Sinulog dance nga kasagaran kabahin sa maayong pag-ani ug maoy kasagaran nga tema sa pagsayaw sa Sinulog isip pasalamat kang Senyor Sto. Niño. Ang pagtuo man god sa mga tawo kaniadto nga basta maayo sila og ani sa mga pananom, gihatagan silag grasya sa ilang giila nga ginuo labi pa kay kadaghanan sa mga tawo kaniadto mga pagano.
Gisagop kini sa nanglabay nga dynasties nga gibase nila sa lunar calender. Hangtod nga niadtong 1912, ang kagamhanan sa China sama sa kasagarang ubang kanasuran nisagop sa Gregorian calendar ug niwagtang sa lunar calendar. Apan ang mga tawo, nagdumili gihapon sa pag-wagtang niini kay mao ang ilang naandan.
Mao to nga ang kagamhanan sa China mibahin sa ilang kalendaryo. Ang Gregorian calendar ilang gisagop alang sa mga kalihukan sa kagamhanan nga maoy sundon sa mga empliyado sa pribado ug gobiyerno, eskuwelahan ug ubang mga organisasyon. Samtang ang lunar calendar maoy gigamit sa mga tradisyonal nga kalihukan sama aning Chinese New Year. Niadtong 1949, gisugdan usab pagsaulog sa mga Tsino ang Spring Festival nga gihimong nationwide holiday. (bobbygnalzaro@gmail.com)