Duna na say mga opisyal sa tambalanan ug Philhealth nga gipangkiha og graft sa National Bureau of Investigation (NBI) 7 human nakaplagan ang giingong anumalusong mga claim sa refund sa coronavirus disease (Covid-19). Bisan di Covid ang sakit sa pasyente, gibutang kini nga nasakit ug namatay sa mao nga balatian.
Resulta kini sa imbestigasyon sa NBI 7 human makaplagi usab sa kaulohan ang sama nga palusot. Di lang kay kini ra, duna pay nakaplagan ang mga ahensya sa kagamhanan nga nag-imbestigar sa anomaliya sulod sa Philhealth. Binilyon ang pundo nga giingong nangawala hinungdan nga hapit mahurot ang pundo sa ahensya sa kagamhanan.
Mas maayo nga paladman pa sa NBI 7 ang ilang imbestigasyon, di lang sa Covid, kon di maglakip na usab sa uban pang mga transaksyon aron masuta kon duna pa bay laing anomaliya nga nalambigitan ang buhatan. Kay kon tinuod kining nakaplagan nga mga anomaliya, hayan duna pay lain nga wa pang Covid.
Posibleng di kini una. Duna pay daghang nangagi. Kana bang nahimo nang kabahin o nainstitusyon na ang mga palusot. Nahimo nang normal ang pangurakot.
Kadudahan nga di kini una, kana kon tinuod man, nga dunay pagpaburot sa mga claim sa reimbursement. Kay kon nahimo kini karon sa panahon sa Covid, duna kini gigikanan o nagsukad ang buhat katuigan na ang nanglabay. Karon lang ni nabulgar panahon sa pandemya.
Hinuon, kon ebidensya ang basehan, hayan lisod na kini pamatud-an, labina nga nabulgar kining nadiskobrehang anomaliya. Gawas kon dunay mangisog sa pagpagawas sa kamatuoran. Kay segurado nga kon duna man, daghan pa ang madiskobrehan nga mga palusot. Segurado usab nga di lang kay sa Philhealth ra ang kurapsyon, naa kini sa kadaghanan sa mga buhatan sa kagamhanan. Kay ang kurapsyon lagi nahimo nang institusyon sa hapit tanang mga tranksaksyon.