SA MGA nagplano nga mosaulog sa ilang Valentine’s Day karong Pebrero 14 uban sa inyong hinigugma, pamilya ug higala mahimong ilakip sa inyong plano nga mosuroy sa Cabana Grill & Seafood Restaurant sa Barangay Punta Engaño, Dakbayan sa Lapu-Lapu.
Ang Cabana restaurant kabahin sa The Mark Resort.
Sa mga nangita og romantic dinner nga swak sa inyong budget ang Cabana adunay gitanyag nga affordable Valentine’s Day dinner set.
Gawas sa lami-ang pagkaon, dili kabayran ang sea view atol sa inyong pagpanga-on nga makadugang sa romantic feel ning buwan sa gugma.
Ang maong restaurant nag-atubang sa Hilutungan Channel.
Si MJ Choi kon Miong Jun Choi (Korean name) nga maoy chief executive officer sa maong establisemento mipasigarbo sa ilang mga bestsellers nga pagkaon nga dili kamahayan niadtong makatilaw.
Giangkon ni Choi nga grabe sila nga naapektuhan sa pandemic resulta sa coronavirus disease, apan karon iyang gikalipay nga anam nga pagduaw sa mga local guest sa ilang restaurant.
Siya mihangyo og pasabot sa ilang guest nga hugtanon nilang gipatuman ang health protocol ug 50 porsento sa total seating capacity sa ilang restaurant ang ilang gipatuman.
Valentine's Dinner
Giangkon ni Choi nga regular ang kantidad sa ilang pagkaon ug aduna sab sa ilang menu diin ang uban mahalan sa presyo, kini gumikan kay premium quality sa ingredients nga ilang gisagol.
Apan di maguol tungod kay adunay Valentine’s Day promo nga ilang gitanyag alang ning Pebrero, ang “Dear My Love” special dinner set.
Adunay duha ka pilian sa maong dinner set; ang Rib Eye Steak & Rock Lobster set nga anaa sa P2,490, ug ang Pork Steak set nga anaa sa P1,590 pulos good for two, plus adunay glass of wine.
Ang maong special dinner set adunay Valentine’s chocolate dessert dunganan sa acoustic band performance. O, di ba makakilig?
Menu
Sa kadtong mo-order og a la carte adunay daghang kapili-an diha sa ilang menu.
Ania ang pipila nga ilang gitanyag nga pagkaon og mag-una ta sa appetizer diin garbo sa Cabana ang ilang “Best Choice” nga Calamares Onion Tower, P315, nga adunay duha ka matang sa sauce nga makapadugang sa kalami niini.
Naa sab ang refreshing nga Yogurt Salad, P295, fruity lettuce salad nga adunay Greek yogurt sauce.
Sa pasta, anaa ang Seafood Alio Olio Pane, P430, nga giparesan og toasted baguette.
Aduna sab silay Half Garlic Gambas, P450, diin two-in-one plate kay ang gitunga ang Creamy Cheese Gambas ug Spicy Gambas nga gipatung-an og garlic rice.
Ayaw sab sipyata sa pagtilaw sa ilang Korean Crispy Chicken adunay tag-P350 ug P600 depende sa gidaghanon.
Sa gusto og burger ug pizza duna sab sila, ilabi na ang ilang 55 cm. nga gitas-on nga Baguette Pizza, P680.
Adunay drinks ug wines nga kapili-an nga makatagbaw sa kauhaw, ilabi na ang ilang Summer Paradise cocktail.
Sa dili mahilig og alcoholic drinks anaa ang Berry Mix shake, P150; Mango shake, P150; Pineapple juice nga gisulod sa prutas nga pinya ug uban pa.
Operations
Ang Cabana bukas matag adlaw gikan sa 11:00 sa buntag ngadto na sa 9:00 sa gabii.
Busa kadtong buot mag-dine in sa Cabana mas bintaha nga mag-advance booking o motawag alang sa reservation pinaagi sa ilang official Facebook page nga Cebu Cabana Grill & Seafood Restaurant.
***
Modawat og contributor
Sa mga “certified hinuroy,” mamahimo ninyong i-submit sa Superbalita Cebu ang inyong kasinatian sa mga dapit nga inyong nasuroyan.
Higayon na nga mapatik dinhi sa pamantalaan ug sa Superbalita Cebu website ang inyong Suroy escapade.
Mamahimo ninyong i-submit ang inyong materials (maximum 500 words o 3,000 characters/high resolution pictures): florendaquerubin@gmail.com alang sa dugang pangutana mamahimong makatawag sa 09154410665.