Dugay nang nawagtang ang pitaka ni Paul Grisham sa pinakatumoy’ng bahin sa kalibutan, gani, nakalimot na siya niini.
Apan human sa 53 tuig, nabalik sa 91 anyos nga taga San Diego, California ang iyang pitaka nga kompleto pa sa tanang sulod. Sa dihang nahinabi sa The San Diego Union-Tribune, gipaambit ni Grisham nga nakurat siya human niya madawat pagbalik ang pitaka niadtong Pebrero 6, 2021.
Kompleto pa kini sa iyang mga ID ug importanteng butang human siya gi-assign didto isip Navy meteorologist niadtong dekada 60.
Sud sa iyang pitaka mao iyang Navy ID card, driver’s license, reference card kalabot sa kung unsay buhaton kon adunay “atomic, biological ug chemical attack,” beer card, tax withholding statement ug mga resibo sa mga gipamalit niya alang sa iyang asawa.
Si Grisham kinsa lumad sa Douglas, Arizona, nagsugod og serbisyo sa Navy niadtong 1948. Nahimo siyang technician ug pagkahuman weather forecaster.
Na-assign siya sa Antartica isip lakip sa “Operation Deep Freeze” nga nagsuporta sa mga sibilyan nga scientist. Mga 30 pa iyang iyang niadtong panahuna, minyo nga may duha ka buok mga anak.
“I went down there kicking and screaming,” sumala niya sa Union-Tribune.
Atol sa iyang pagtrabaho didto, nawagtang niya ang iyang pitaka ug wa na niya kini hunahunaa pa.
Nakit-an ang pitaka niadtong 2014 atol sa demolisyon sa edipisyo sa McMurdo Station sa Ross Island sa Antarctica.
Duha ka pitaka ang nakit-an atol sa McMurdo demolition, ang usa niini ka Grisham ug ang ikaduha nabalik sa pamilya sa usa ka lalake nga namatay na niadtong 2016.
Padayag pa ni Grisham nga sa kalayo sa kadako ug kalayo sa Antartica, wa siya magdahum nga makit-an ug mabalik pa niya iyang pitaka. / AP