Ang lawas sa tawo maoy templo sa Dios. Busa dili maayong tandugon sa sobrang isog nga mga tambal ug eksaminasyon nga ang lawas dili makasugakod ilabina og minos ang resistensya ug huyang ang immune system.
Mao man gani nga panahon sa pandemiya maayo nga mopuyo lang sa balay, inom sa irekomendar nga tambal, bitamina, sustansyadong pagkaon ug lab-as nga utanon.
Uban mipili sa herbal kay walay side effects, walay overdose kansang mga sagol puno sa medicinal qualities. Dunay misagop sa kinaraan sama sa haplas, hampol ug tuob.
Gumikan sa kasinatian sa siyensya ug medisina nasobraan ang pamaagi ilabina kon matan-aw nga dunay ikabayad ang pasyente. Misubol ang katahap.
Dinhi magasukad ang lakang sa pamilyang Garcia nga mikonsulta og medical expert nga si Dr. Ravi Venkata Durvasula aron motino, motuki ug mosusi sa medical records kon duna bay angayng manubag
sa kamatayon nila kanhi Dumanjug Mayor Nelson Garcia ug Barili Mayor Marlon Garcia.
Kadudahang sirkumstanya sa magsuon nga samag tambal, sama og ospital, sama sa intensive car unit ( ICU) ingon og dunay pattern. Nasuta nga daghang tambal ug laboratory test nga wala na kinahanglana human magnegatibo sa Covid-19 ug gipugngan sa pagpagawas. Komplikasyon ug inpeksyon ang namatyan.
Buot sab sutaon ang anomalosong pagpaburot sa bayranan sa ospital nga moabot og P8.7 milyunes. Nunot niini, ang pamilyang Garcia misang-at og kasong medical negligence sa Cebu City Prosecutors Office batok nila Dr. Elfreda Hernandez ug Dr. Ivon Montejo nga nag-atiman sa magsuong Garcia.
Kasong sibil batok Chong Hua Hospital ug laing criminal complaint batok sa mga opisyal sa maong tambalanan. Mipasidaan ang pamilyang Garcia sa mga sakop sa CFI Cooperative nga likayan ang pagpa-admit sa Chong Hua tungod sa dili maayong kasinatian nga ilang nahiagoman.
Unsa man diay kapuslanan sa pagbandilyo sa Chong Hua nga nakaserbisyo nag usa ka gatos ka tuig? Tua na sa korte mahisandig ang hukom
Dunay opisyal nga nagpositibo sa Covid-19. Wala magpaadmit. Midangop sa home quarantine mitomar og tambal, bitamina, tuob, wala makaabot og P3,000 ang gasto naayo sa maong balatian. (csa_1156@yahoo.com/0906-464-8954)