Sa una mikropono ug instrumento maoy gikuptan isip tinubdan sa panginabuhian. Tungod sa pandemya baldi nga puno sa isda ug timbangan mao nay iyang gibiking samtang nagsuot suot sa kabalayan.
Matag adlaw nga tanan ang pagpanuroy og isda kabahin na sa inadlaw nga hagit ni Marvin Dullo, pagpangita og masapian aron ibuhi sa iyang pamilya. Tungod sa pandemiya ang pagtukar sa mga imnanan kuyog sa iyang anak nga ulitawo nga si Kevin Mark, daw aso nga kalit lang nshanaw.
Niadtong wa pay Covid-19 daghang musikero sama kang Marvin ang nahimo nang kabahin sa pagsulbong sa Sugbo isip nag-unang destinasyon sa mga turista. Pangita og lugar nga gusto ka maglulinghayaw nga way music. Naa gyud na siya ilabi na sa panahon sa kagabhion.
Usa ka buntag samtang nanuroy siya og isda ako siya nga gipangutana kong ang iyang grupo nga gitawag og Jacob’s Ladder Band motukar gawas sa dakbayan sa Sugbo, diin ang turismo mas gihatagan karon og prayoridad.
Iyang tubag, dili pa kay naa silay nahunahunaan nga paagi aron makasapi. Ang iyang gipasabot ang gitawag nga “busking” kun tukar sa publiko diin ang mga tawo nga makauyon motunol og pipila ka piso. Sikat ni sa gawas sa nasod niadtong wa pay pandemiya. Ug mao ni akong nasaksihan sa kilid sa tennis court daplin sa karsada sa Barangay Poblacion Parfo sa dakbayan sa Sugbo sa miaging semana.
Si Marvin, Kevin Mark ug ilang gitarista nga si Herbert Angga abg nisalida. Daw nabag-ohan ang mga tawo nga niagi, bisan pa man sila namaulibg malipayon nga ginagmayng paagi ilang nalingaw ang mga Pardohanon.
Sa ilang pagbalik kuyog na nila ang laing musikero nga si Patrocinio Vosotros nga magtukaran sa cruise ship kaniadto. Nisamot ka alegre kay nagpaduol naman sila sa merkado sa Pardo.
Pagkaugma nadungagan ang ilang grupo kay ang laing Inayawanon ngacsi Banjo Abasolo pwerte nga nakakanta sa mga novelty songs ni Yoyoy Villame ug Max Surban. Usa ka SUV niagi sa ilang tungod ug ang nagmaneho niabli sa bintana og nitunol og 600 pisos. Hilabihan nilang lipaya.
Sa ilang pagpauli dul-an sa duha ka libo pesos ang ilang nadala. Salamat sa mga tawo nga nisabot sa ilang kahimtang.
Labaw sa tanan kang Kapitan Archie Araw Araw nga nihatag kanila og pagtugot nga makatukar. Gahapon kay way tukar ang grupo nagkita mi si Marvin nga nagbitbit sa balde ug timbangan. Inay title sa kanta, mga klase klasing isda iyang gipaila ila. Sama sa silay, pugapo, samin samin, katambak, solid, dalagang bukid., maya maya ug danggit nga hilabihang lab-asa.