Tungod sa pagsaka og balik sa kaso sa coronavirus disease sa dakbayan sa Sugbo, andam og tagana ang lungsod sa Alcantara, Cebu sa pag-host sa unang conference sa bag-ong professional basketball league sa nasod nga mao ang Vismin Super Cup.
Kini maoy gipadayag sa batan-ong mayor sa Alcantara nga si Fritz Lastimoso atol sa preliminary inspection sa mga opisyales sa Vismin Super Cup uban sa mga staff sa Games and Amusement Board (GAB) sa ilang dapit niadtong Huwebes Pebrero 11, 2021.
"We are very excited and very honored that the GAB visited our gym and it seems they are quite satisfied in their assesment. But we have to finalize everything should and when the league would push through," matod sa mayor.
Sa kasamtangan, doble kayod ang gihimo karon sa pag-renovate sa Alcantara gym aron matukma gyud ang desinyo sa pagpatuman sa mga health protocols nga ipasunod sa GAB ug ingon man sa Inter-Agency Task Force (IATF) atol unya sa torneyo nga sugdan sa una o ikaduhang semana sa Abril.
Lakip sa gi-inspection sa GAB mao usab ang mga dapit nga papuy-an sa mga players sama sa mga beaches ug resorts nga anaa mahimutang sa Moalboal, ang kasikbit nga lungsod sa Alcantara.
Si Lastimoso mipadayag nga tungod sa kadako ning maong event, makig-coordinate sila sa local government unit (LGU) sa Moalboal ug Badian.
Mangayo usab sila sa hugot nga suporta ni Cebu Governor Gwen Garcia sanglit mihaom man usab kini sa programang turismo sa probinsiya sa Sugbo taliwala ning nagpadayon nga pagkatap sa coronavirus disease.
"We are very much prepared we have even rehabilatated our gym to fit the specifications of the Games and Amusement Board (GAB). In short we are very very ready and excited," dugang sa mayor kinsa nakahigayon usab og pagpakighinabi ni GAB chairman Baham Mitra pinaagi sa cellphone.
Nagtuo si Lastimoso nga dako og matabang ngadto sa ilang gamayng lungsod ang paghost ning maong lega sanglit makahatag kini og pangalan.
"This is tourism and Alcantara will be placed in the map of Cebu and in the Philippines even if it is a fifth class municipality. And this would be an honor and a great experience for my constituents and the rest of the Cebu province," panapos sa mayor.
Si Jimmy Donton, ang nangulo sa GAB uban ni Rolando Mendoza, misalig sa kapabilidad sa Alcantara sa paghost sa mga duwa.
Apan gitutokan usab nila og maayo mao ang mga hotels ug beaches kon makatuman ba kini sa mga protocols nga gusto nilang ipasunod.
Sa sayo pa, ang general-secretary sa Vismin Super Cup nga si Chelito Caro ingon man ang league ambassador nga si Cebu City councilor Dondon Hontiveros nagkasabot nga dad-on sa probinsiya ang Vismin Super Cup.
Kini tungod sa pagsaka og balik sa kaso sa Covid-19 diin ilang napanglantawan ang kahigpit ug kalisod unya sa ipasunod nga health protocols sa IATF.
"High risk man gud ang Cebu City, so we decided to bring it sa province kay low risk ra man sila," matod ni Caro.
Ang Alcantara adunay gilay-on nga 94.9 kilometros sa kasadpang bahin gikan sa dakbayan sa Sugbo. (JBM)