Di maayo ang buntag sa Chinese New Year nako kay duha ka mga hitabo nga naglambigit og bikers ang akong nakit-an dayon sa social media. Una, ang kamatayon sa hamtong nga lalake nga nadasmagan sa usa ka motorsiklo nga naghaguros sa may Cebu South Coastal Road. Namatay diha-diha ang biker samtang ang driver sa motorsiklo patay nga niabot sa tambalanan.
Ang ikaduha naglambigit sa usa ka lalakeng biker nga batan-on nga sa akong pasiunang nahibaw-an, naigo sa usa ka bus sa Ceres sa may Barangay Busay. Naangol ang biker.
Wa ko masayod kinsa nga sala ang hitabo sa coastal road, apan sumala sa taho sa kapulisan kusog ang dagan sa motorsiklong Raider dihang mao say paglabang sa biker nga nagdala sa iyang bike nga nilatas sa center island.
Di ikahibung kon kusog ang dagan sa motorsiklo kay diha sa south reclamation kuyaw sab nga madagit ka kon maghinayhinay. Kay diha nagsubay ang driver sa Raider sa kilid sa center island, kusog ang iyang dagan kay naa man siya sa inner lane.
Kay kusog ang dagan sa mga sakyanan, kon naa ka sa south reclamation doblehon ang pag-amping. Hinaut pang ang hitabo mamahimong leksyon sa mga biker nga mag-anhaan sa dapit.
BUSAY
Mga 10 ka tuig na ang nakalabay, tambayanan namo sa akong mga higala ang ilang Willy Ardiente sa Barangay Busay. Diha ko nakapag usab og mga higala, gawas sa mga biker nga tigtambayan sa Aison Bikeshop sa dan A.S. Fortuna.
Apan niundang ko sa pagtambay human akong nabantayan nga nagkadaghan nang mga sakyanan, labina sa mga van-for-hire nga magpahaguros sa pagpadagan agi sa Busay padung sa Transcentral Highway.
Misamot na karon nga sukad nag-pandemic naa nay mga Ceres bus. Naa ra bay ubang drivers aning Ceres danghag. Utro sab ning batan-on nga mga biker nga kon magpadagan maorag naa sa trail, gadanghag lang.
Nakakita ko sa video nga gipadala nako ni Engr. Alan Loyao, makapungot tan-awon ang mga batan-ong nag mountain bike dulhog sa Busay, maora lang og gaduwa. Baya ang karsada di tawon na bike trail.
GIYA
Maayo unta kon kining mga bike organization karon mohimog mga bike clinic aron di magpataka ning bag-o pang bikers sa pagsikad. Makaguol paminawon kay sa usa lang ka biker nga maggara-gara sad an, tan-aw sa mga tawo tanan danghag ug siaw.
Sala sa usa, ratsada tanan.