BUGNAW ba karon ang imong Valentines Day?
Basin anaa ra sa imong social media account ang umaabot nga hinigugma sama aning mga atleta sa Sugbo nga wa nila damha magsugod ang tanan sa usa ka personal message.
Nakahibalo na ang kadaghanan sa istorya sa running career ni Olympian marathoner Mary Joy Tabal, apan niining Valentine’s Day aduna pud siyay mapa-ambit kabahin sa iyang gugma nga nagsugod sa social media.
Ang 2017 Southeast Asian (SEA) Games gold medalist na-engage na ni Lieutenant Junior Grade Hector Dan Jimenez niadtong Enero 14, 2021.
Nagsugod ang tanan sa usa ka personal message ni Jimenez ngadto kang Tabal. Gi stalk na diay ni Jimenez si Tabal pinaagi sa Instagram ug Facebook, nag-send pud kini og mensahe sugod niadtong 2015.
Apan sa 2018 lamang kini nabasahan ni Tabal kay anaa kini sa filtered messages.
“He has been a fan since 2015, he saw me running and competing. He sent me messages na wala nako ma- open until February 07,2018, just 2 months after my papa died. I was still heartbroken that time then I saw his message sa Instagram nga naka filter,” padayag ni Tabal sa SunStar Superbalita.
Ang mensahe ni Jimenez mao ang emoticon nga heart. Didto nagsugod ang ilang panaghigala ug nagkauyab sila niadtong Mayo 1, 2018.
Matod ni Tabal nga nahibawan niya nga seryoso gyud si Jimenez kadtong nag-book kini’g ticket gikan Zambales padung Sugbo para magkakita gyud sila ug magkaila.
Si Jimenez, 27, taga Cagayan de Oro City ug na-assign sa Zambales niadtong panahona.
Naabot ang espesyal nga adlaw dihang gi-surpise ang 31-anyos nga si Tabal og wedding proposal sa miaging buwan.
Plano karon ni Tabal nga mosalmot sa 2021 SEA Games sa Vietnam usa sila magpakasal sa sayong bahin sa 2022.
Sa laing bahin, ang istorya sa gugma sa sprint distance runner ug nursing student nga si Jhuvan Baculot gasugod gihapon sa usa ka personal message.
Si Baculot ug ang iyang 24-anyos nga boyfriend nga si Joshua Ahern nga taga United Kingdom anaa sa long distance relationship, apan bisan paman niini na-engage gihapon ang duha niadtong Enero 20, 2021.
Nagkaila sila sa usa ka social media dating site.
Matod ni Baculot nga na surprisa siya sa mensahe ni Ahern niadtong Marso 2020 nga miingon: I’m actually from the future and we’ve been married 15 years and I’m just trying to settle an argument on when our first date was."
Tungod kay na-intriga sa maong intro message, gi replyan kini ni Baculot ug didto na gasugod ang ilang LDR. Human sa 10 ka buwan mi-propose na si Ahern kang Baculot.
Nagkaila si Baculot ug iyang fiancé panahon sa GCQ diri sa Cebu ug nakatabang kini nga mawala ang iyang gibati nga depresyon niadtong panahona.
Plano sa duha nga magkita ug magpakasal na kon molugak na ang travel restriction sa nasod tungod sa Covid-19.
“Wa gyud koy gikamahayan ng ani yes ko niya. Gituyo sa Ginoo nga nagka-meet mi kay ato nga time naa ko sa akong lowest kay height to sa Covid-19 pandemic and GCQ pud ta,” ingon ni Baculot.
So, unsa paman imo gihuwat e-message na si crush, Ka-Super. Happy Valentines Day.