DIDTO sa Estados Unidos, dako ang posibilidad nga di madayon ang pagsalida sa “Black Widow” ug “F9” karong tunga-tunga sa 2021. Dili pa sila siguro nga makab-ot ang giingong “herd immunity” bisan pa man og nagsigi na silage pangbakuna sugod sa miaging Disyembre.
Dinhi sa Syudad sa Sugbo, di daw gusto ang atong mga opisyal nga ablihan ang mga sinehan. Apan, ilang gitan-aw kini isip lakip sa pagpabalik na sa normal sa atong ekonomiya. Sa lalawigan, gitugtan na ang mga turista gikan sa ubang mga lalawigan sa pagsulod nga dala lang ang reserbasyon sa ilang mga hotel ug resort.
Kini ang giduso sa atong mga opisyal bisan pa man nga nagkasaka pagbalik ang mga kaso sa Covid-19 samtang nagpakita og kalugak ang mga paninguha nga mabakunahan ang atong populasyon.
Lahi lang gyud ang akong panglantaw tingale kabahin niining pagbakuna. Alang kanako, angay lang gyud unahon ang bakuna aron mas dali kitang makabalik sa normal.
Kon kuyanap na ang pagbakuna dinhi sa Sugbo, di na kita mahadlok mogawas aron motrabaho o maglulinghayaw lang. Mas modaghan ang mga kustomer sa mga tindahan ug mga kan-anan. Gani, di na kita mahadlok mosulod og mga sinehan sa mga mall.
Gani, mas modako ang kumpyansa sa mga investor nga mopagawas sa ilang kwarta kay mas dali silang makabawi sa panahon nga mabakunahan na ang katawhan.
City Hall
Mabalaka lang gyud kita sa kahimtang sa liderato sa City Hall kay magsigig hisgot lagi sila si Mayor Edgar Labella ug Bise Mayor Mike Rama nga suod silang higala. Apan di man kalikayan nga samtang nag-work-from-home si Labella, ang tibuok Syudad sa Sugbo di mahimutang sa iyang kahimtang sa panglawas.
Samot nga di mahimutang si Bise Mayor Rama kay iya baya nga responsibilidad nga mo-takeover sa pagka mayor samtang magpa-alim ang mayor. Maka-insulto man gud nga ingnon lang kita nga nag-ear infection ang mayor.
Mahibong lang gyud ko nganong di motug-an si Mayor Labella sa tinuod niyang sakit nga maklaro man sa iyang mga live press conference nga nanglagom ug nanghupong ang iyang nawong. Tungod ba kay maulaw siya moangkon? O tungod ba kay wa gyud siyay pagsalig sa bise mayor.
Kapitolyo
Lahi ang kahimtang sa lalawigan. Wa kita makauyon sa panahom ni Gob. Gwen Garcia nga di niya importante karon ang bakuna ug unahon ang hinay-hinay nga pag-abli sa ekonomiya. Apan, siguro kita nga siya ang nagtimon ug halos kada adlaw niyang gipasabot ang katawhan sa iyang baruganan.
Klarong lig-on ang iyang panglawas ug di siya sama sa laing opisyal nga nag-chemo ug gi-sepsis.
Bisan pa man, ako lang gyud ipadayag nga mas epektibo nga unahon ang bakuna aron dili na kita magpanuko nga magnegusyo ug manuroy.
Hinuon, matod pa sa usa nato ka higala, lahi baya og style si Governor. DM sa @anol_cebu