KON way kausaban sa dagan, hayag na ang posibilidad nga adto ipahigayon sa lungsod sa Alcantara, Sugbo ang unang conference sa bag-ong professional basketball league sa nasod nga mao ang Vismin Super Cup.
Atong gidayeg ang way pagduhaduhang desisyon ni Alcantara Mayor Fritz Lastimoso nga hangupon ang dakong hagit sa kapabilidad sa ilang lungsod taliwala ning nagpadayon nga pandemya sa tibuok kalibutan.
Sama ni Cebu Governor Gwen Garcia iyang gipatugbabaw ang ekonomikanhong kalihukan batok sa hulga sa coronavirus disease.
Dala ang pahimangno sa pagpadayon nga pagmatngon, tinguha ni Lastimoso nga ipadayon ang pag-usbaw ug pagpasulbong sa ekonomiya dili lang sa iyang lungsod kon dili sa kasikbit nga dapit pinaagi sa sports tourism.
Sayod siya unsa ka dako ang responsabilidad sa paghost niini, apan iya usab napanglantawan kon unsay mga dagkong benepisyo nga mahagdaw sa iyang gamayng lungsod.
“This is tourism and Alcantara will be placed in the map of Cebu and in the Philippines even if it is a fifth class municipality. And this would be an honor and a great experience for my constituents and the rest of the Cebu province,” matod sa batan-ong mayor.
Ang gipakita sa mayor nakaagni og positibong pagsanong gikan sa mga kadagkuan sa Vismin Super Cup ug ingon man sa mga opisyales sa Games and Amusement Board (GAB) kinsa maoy mogiya na unya sa pagpasunod sa mga health protocols nga ihatag sa Inter-Agency Task Force (IATF).
Mismo si GAB chairman nga nahinabi ni Lastimoso pinaagi sa cellphone misaludo sa koperasyon ug kaagresibo sa mayor.
Aduna man tuoy mga ginagmayng hapsayonon ilabi na sa mga beaches ug hotels nga kapuy-an sa mga teams apan dili kini babag sanglit dali ra kining mahatagan og solusyon.
Sa kasamtangan, dobleng kayod karon ang gihimo sa Alcantara aron ma-comply ang mga specifications sa ilang gym nga maoy gisugyot sa GAB ug sa Vismin Super Cup.
Nagtuo ang mayor nga kining maong kalihukan nahitukma ug nahisubay usab kini sa program ni Gov. Garcia nga mao ang sports tourism sa Sugbo hinungdan nga dako ang iyang pagtuo nga moitsa ang gobernadora og hugot nga suporta niini.
Hinaot nga dili makawang ang tanan.
Mora man og nasimang ang dalan nga gisubay sa team ni Kai Sotto nga mao unta ang mogiya kanila ngadto sa National Basketball Association (NBA).
Kini tungod kay imbis makaduwa na unta siya didto sa D-League sa NBA apan kalit kining mibiya sa team tungod kay gusto siyang moduwa sa Gilas Pilipinas alang sa third window sa 2021 Fiba Asia Cup qualifiers nga duwaon didto sa Doha, Qatar.
Tuod man nahikuyog gyud siya sa Gilas apan sa wala damha nakanselar ang maong tournament tungod sa pagsulbong sa kaso sa coronavirus.
Nagtinguha na karon ang team ni Sotto nga mobalik sa US aron moduwa na sa Ignite team, pero ambot og komportable pa ba kaha niya ang management niini.
Sa didto pa gud ni si Sotto sa US nga nagsigi og insayo sa team, mismo si coach Brian Shaw nasurprisa sa dihang si Sotto mipahibawo nga prayridad niya ang pagduwa sa Gilas.
Gani gihimangnoan niya ang 7-3 nga prospect nga dili palabyon ang kahigayonan kay anaa sa D-League ang mata sa mga recruits sa NBA teams. Pero wa gyud siya kapugong niini.
Dunay mga rason nga nanggawas nga dili kuno gamiton kaayo si Sotto sa coach atol sa ilang praktis hinungdan nga mas ganahan kini nga ari sa Gilas moduwa.
Karon gusto na ni Sotto nga mobalik sa team nga sa kasamtangan nakaposte na og 3-0 nga baraha nga wala siya.
Anaa na karon sa team ang desisyon. Mahimong kuhaon og balik tungod kay anaa siya sa lineup, apan mahimo usab nga balibaran kay wala na man siya kinahanglana sa team. Modaog man bisan og wala siya.
Mao nay giingon nga nasayang lang ang oportunidad ni Sotto. Nasagulan og dimalas. Hinuon, bata og hataas pa ang panahon alang kaniya. Daghan pa ang kahigahyonan. (jun.migallen22@gmail.com)