LUOY ang mga molupyo sa duha ka mga barangay sa dakbayan sa Sugbo human nahikawan sa naandang alegreng kisaw sa Valentine's Day o Adlaw sa Gugma, Dominggo, Pebrero 14, tungod sa pagpahamtang og lockdown matag Dominggo o pagkontrolar sa dugang pagkatap sa virus sa barangay.
Unang nipatuman sa lockdown mao ang Barangay Guadalupe sugod sa sayo ning buwana human nag-una sa mga barangay sa dakbayan sa Sugbo sa nagsaka nga mga kaso sa coronavirus disease 2019 (Covid-19).
Gilimitahan pag-ayo ang paglihok sa mga tawo sa publikong dapit uban sa estriktong pagpatuman sa health protocol ug ang pagsira gyud sa barangay sa adlaw nga Dominggo apan kadtong mga trabahante ang gitugotan nga makagawas.
Ang Valentine's Day karong tuiga natunong sa Dominggo.
Ang lokal nga kagamhanan sa Barangay Lahug mao ang ikaduhang barangay sa dakbayan nga nakahukom sa pag-estrikto og balik pinaagi sa pagpatuman sa community quarantine guidelines.
Ang mga opisyal sa Lahug, pinaagi sa usa ka resolusyon, nimando sa tanang estabilisemento sa pagsira sa ilang negosyo sa Dominggo sugod sa Pebrero 14. Ang control points gibutang na sa pag-aninaw sa lihok sa publiko.
Ang kasamtangang safety guidelines ang gipatuman og balik nga naglakip sa mandatory stay-at-home, quarantine pass, curfew, ug pagdili sa dinaghan nga panagtapok.
Ang Lahug usa sa mga barangay nga taas ang kaso sa Covid-19 nga niabot og 89 sud sa miaging 14 ka adlaw, base sa talaan sa Pebrero 12, Biyernes.
Mingaw ang Adlaw sa Gugma sa duha ka barangay apan mas layo usab sa kakuyaw sa virus. Himsog nga gugma atimana.