HANGTOD karon, dunay mga tawo nga di mosul-ob og face mask, usa sa mga giingong proteksyon aron di matakdan sa Covid-19. Lain-lain ang mga hinungdan ug katarungan. Lakip sa nangreklamo kadtong maglisod sa pagginhawa.
Si Cebu Gov. Gwendolyn Garcia niingon nga ang bentaha sa maskara kay matabunan kadtong mga bati og nawong. Morag pareho ra sab kon guwapa, matabonan sab sa face mask. Niining paagiha ang face mask usa ka equalizer, patas ang tanan.
Ang lisod kon di magkailhanay tungod sa mask. Sama niadtong pasiaw sa magtiayon nga nag-shopping. Naglagot ang bana kay daghan kaayo’g gipalit ang iyang asawa. Maong iyang gibunlot bisag nilugnot, gipasulod sa sakyanan ug namauli sila. Pag-abot sa balay, pagtangtang gyud sa face mask, di man diay iyang asawa, amang pa gyud.
Kadto usa pa gani ka face mask. Subay sa bag-ong pagtuon sa Centers for Disease Control and Prevention (CDC) sa Estados Unidos epektibo ang maskara sa pagkontrolar sa pagtakod sa Covid-19.
Dunay ginaingon sa Iningles, nga “two is better than one.” Basta di lang bunal. Ang labing ulahing pagtuo sa US CDC nag-ingon nga mas epektibo kon doblehon sa pagsul-ob ang face mask. Mao kini ang gitawag nga double-masking.
Sa ato pa, ang ordinaryong disposable surgical mask mahimong sapawan og laing layer sa panapton. Ang ordinaryong surgical mask makaali lang sa 42 porsiyento sa particles nga nagdala sa coronavirus. Ang proteksyon mosaka ngadto sa 92.5 porsiyento kon sapawan og hugot nga panapton.
Mas mosaka pa gyud ang proteksyon ngadto sa 96.4 porsiyento kon doble ang maskara nga gitaptan sa Covid-19 ug kadtong naa sa duol niya gidoble sab ang maskara. Mahinungdanon sab nga ang maskara nagtabon gyud sa ilong ug baba, di kay ibutang lang sa suwang.
Kon subayon kining maong lagda, pareho ra sa kang Spider-Man nga ang costume nagtabon sa tibuok lawas ug nawong. Ang maskara sa ubang superhero way apil og tabon ang baba ug ilong.