ANG live report ni ka Super Benjie Talisic sa Facebook sa miaging Biyernes sa gabii, nakapahingangha nako sa makadiyot. Ang unod sa iyang report sa sulod sa barangay hall sa Barrio Luz sa dakbayan sa Sugbo, naghisgot sa kamatayon ni Kapitan Ronnie Sab-a samtang naligo sa dagat sa lungsod sa Liloan.
Gi-interview niya ang mga barangay konsehal pagkutlo sa resulta sa ilang emergency meeting.
Dinhi nanumbalik sa akong panumduman nga ang susamang barangay hall nga gibisitaan ni Benjie mao rang dapita ang akong gisaka sa dihang nangita ko kang Kap Ronnie sa miaging tuig.
Ang akong tuyo nga makumusta ang sitio Zapatera, sakop sa maong barangay nga maoy sentro sa ginagmay nakong pagdukiduki alang sa unang episode sa YouTube channel nga among gimugna. Kini ubos sa Password TV kauban sa akong higala nga si Romulo Aying. Kadto maoy una nakong paghimamat ni Kap Ronnie.
Ang iyang pagka maabiabihon maoy unang senyalis nga nahatag nako og kadasig nga matuman nako ang akong tahas paghagpat sa mga kasayuran nga gustong masayran sa publiko labot sa nabaniog kaayo nga lockdown sa sitio Zapatera.
Tuod man way daghang langas, nagsugod dayon ang interview sa iyang opisina human ko nagpaila kuyog sa akong cameraman nga si Henryboy Marquez, nga iyaha sab diay nga batchmate sa high school sa University of the Visayas. Ang isyu mao ang tinakdanay ug lockdown sa sitio Zapatera.
Gitubag niya ang akong mga pangutana hangtod nga boluntaryo niyang gipaambit nako ang diriyot niya nga pagluwat sa katungdanan tungod sa mga saway nga iyang nadawat labi na sa social media. Gi-question ang iyang pagdumala sa pandemiya sa maong sitio, nga kon buot hunahunaon kadto maoy unang higayon nga ang amahan sa barangay sama niya makig-away sa virus nga dili makita.
Nakasabot ko sa iyang sentimento. Dili sayon ang iyang nahimutangan isip kapitan pagdumala sa tinakdanay sa maong sitio ug pagpahapsay sa pamuyo sa mga tawo nga gi-lockdown sa gobyerno.
Ako ug akong cameraman nga iyang gipakuyogan sa iyang staff pagsulod sa maong sitio, makaingon nga bisan kinsa siguro nga kapitan nga maigo og lockdown ang usa nila ka sitio tungod sa tinakdanay, di makayanoyano og pangarisgar sa unsay angay nga buhaton.
Ang unang tawo nga natakdan sa Covid-19 dinhi sa Sugbo, akong na-interview face to face didto mismo sa iyang nataran, apil na ang mga silingan nga iyang natakdan. Nakaingon ko pagkalisura sa sitwasyon.Gipang-Covid man gani ang mga pulis nga nipatuman sa lockdown.
Si Maj. Juanito Alaras, kanhi hepe sa Mabolo Police Station, diin ang Barangay Luz ubos sa ilang hurisdiksiyon, nitug-an nako nga Abril 7, 2020 sa hapon ilang gi-lockdown ang sitio Zapatera. Wala sab magdugay si Alaras ug iyang mga sakop na-Covid nga niresulta sa pagka-lockdown sa ilang police station.