Mag-level up na ang Carbon

■ Daghang itukod sa dapit, sama sa Puso night market, wholesale market, kapilya sa Señor Sto. Niño, ferry terminal ug land terminal.
■ Daghang itukod sa dapit, sama sa Puso night market, wholesale market, kapilya sa Señor Sto. Niño, ferry terminal ug land terminal.

KON merkado sa Carbon ang hisgutan, imong mahuna-hunaan mao mga utanon, bugas, karne, isda ug uban pang nag-unang mga panginahanglanon.

Apan unsa kaha kon sa Carbon market sa umaabot nga katuigan mahimo ka nang mohigop sa imong paborito nga latte sa Starbucks o mokaon sa imong paborito nga fastfood outlet? O ba kaha mopalit sa imong gidamgong signature bag, sandal ug uban pa?

O kon mobiyahe ka man gawas sa Sugbo agi sa Mactan, apan gikinahanglan kang mopalit una og mga sinugatan kun pasalubong nga dinalian, moadto ka lang sa Carbon, diin adto ka makapamalit sa tanan mong gikinahanglan ug human mosakay og ferry padung sa Lapu-Lapu City aron makaabot ka sa imong flight.

Matinuod

Kining tanan di lang damgo o mugna sa imahinasyon kon ang tanang plano sa Megawide, kompaniyang gitahasan sa pagtukod sa modernong publikong merkado sa Carbon, way babag.

Kay gawas sa pagtukod sa merkado, ila usab nga pabarugon sa pito ka ektaryang luna ang ubang mga edipisyo nga maghimo sa karaang merkado publiko nga "first world class." Kini buhaton sulod sa lima ka tuig sugod 2021.

6 blocks

Sa unang phase, ang Blocks 1 ug 2 mao ang bag-ong Carbon Public Market. Ang Block 3 mao ang wholesalers market, Block 4 mao ang lifestyle village, Block 5 mao ang boqueria samtang ang Block 6 mao ang check-in facility ug 24/7 Puso market.

Ang bag-ong merkado, nga gidesinyo nga sama sa karaang train station sa Dakbayan sa Carcar, mobarog sa Freedom Park ug Warwick Barracks. Kini mao ang Block 1.

Ang Unit 2 sa Carbon karon maoy himuon nga tulo ka andanang mall. Yes, tukoran og mall ang Carbon nga maoy magsilbeng lifestyle village na unya kon mahuman.

Ang boqueria gisundog gikan sa Boqueria sa Barcelona sa Espanya nga usa ka public market nga gibaha usab sa mga turista. Anha diha ipamutang ang shops nga naa ang nagkadaiyang mga produkto.

Sa Block 6, anha ipamutang ang duty-free shops ug check-in facility. Mahimo nimong ibilin ang imong mga butang samtang mamalit ka og mga sinugatan sa di ka pa molupad pagbiya sa Cebu.

Kapilya

Ang nakaanindot kay mahimo ra gihapon nga mangompra sa bisan unsang oras sama sa unsay naandan karon kay ang tukuron nga Puso market, usa ka edipisyo nga gikuha ang desinyo sa atubangan, gikan sa puso, mag-operate nga 24/7.Sa mao nga edipisyo anha diha ibutang ang mga ambulant vendor nga naninda og mga utanon, lamas ug uban pa.

Di ba ang mga Sugboanon naila man nga mga deboto ni Señor Santo Niño? Gigahinan sa Megawide og luna alang sa pagtukod sa Santo Niño Park, diin anha usab mobarog ang higanteng imahen ni Señor Santo Niño nga magbuntaug ug makita samtang magdanga-danga ka pa sa Sugbo gikan sa kadagatan.

Mga terminal

Di na usab lisod ang pagsakay kay uban sa pagtukod sa merkado, naa usab ang terminal sa mga sakyanan nga mopadung sa nagkadaiyang mga destinasyon.

Naa usay ferry terminal alang sa mga water taxi nga unang moserbisyo sa Dakbayan sa Lapu-Lapu agi sa Mactan Channel alang sa paspas nga biyahe, labina niadtong moadto sa Mactan Cebu International Airport (MCIA).

Ang ferry sa umaabot nga katuigan, mahimo nang madunggoan sa mga fastcraft nga padung sa Bohol, Negros Oriental ug uban pang mga silingang dapit sa Sugbo.

Apan ang labing importante mao nga ang limpyo, han-ay ug di na gubot tan-awon ang merkado publiko sa Dakbayan sa Sugbo sa umaabot nga katuigan.

Uban sa pagdis-og sa modernong panahon, oras na nga ang Dakbayan sa Sugbo, giisip nga hara sa kasadpan, makabaton na og first world class nga merkado publiko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph